4 января 2017 Продолжение „Новогодней истории“ с участием мелодистов нашего наслега.

Хамаҕатта нэһилиэгин мелодистара кыттыылаах «Биир ырыа ис кута..», диэн ааттанан 11-с сылын ыытыллар тэрээһиҥҥэ 25 киһи кыттыыны ылла.

Хамаҕатта нэһилиэгиттэн киэҥ Сахабыт сирин үрдүнэн аатырбыт айааччыларбыт аҕыйаҕа суохтар. Киэн туттан ааттыыбыт саха дьахталларыттан биир бастакы мелодиһы Светлана Кудринаны, Александр Дунаевы, В.В.Ушницкай – Сэкини уо.д.а.

Ырыаны айааччы, дууьа иэйиитин арыйааччы - туспа дьоҕур. Хас биирдии ырыаны оҕо курдук төрөтөн, бүөбэйдээн, иитэн-сайыннаран таһаарар талааннаах дьонунан мелодистар буолаллар. Хас биирдии ырыа – бэйэтэ ис куттаах, санаалаах. Ырыа айар киһи ис дууһатын таарыйан, санаатын арыйан – ырыа төрөөн тахсар.

Ырыаҕа анаммыт биэчэрбитин иилээн-саҕалаан ыытта бэйэтэ элбэх ырыа автора, мелодистка Светлана Новгородова. «Биир ырыа ис кута..» истиҥ долгутуулаах биэчэри «Саҥа дьыл» ырыатынан олус сэргэхтик арыйда.

Бу күн мелодистар ырыаларын автордар бэйэлэрэ уонна нэһилиэк ыллыыр талааннаахтара көрөөччүлэргэ долгуйа иһитиннэрдилэр.

Анна Заровняева Шура Шамаева хоһоонугар «Ийэкэм» ырыатын толордулар трио - Лена Барашкова, Анна Петрова, Валентина Иванова. Михаил Макаров Константин Петров хоһоонугар «Алаас кыыһа» ырыатын толордо Илья Заболоцкай. «Саҥа дьыл» ырыа автора Степанида Бурнашева бэйэтин ырыатынан кытынна. «Алмаас таас» ырыа автора Дана Парникова ырыатын Наташа Булдакова, автор Дана Парникова дуэтынан толордулар. Любовь Иванова бэйэтин тылларыгар «Хаар» ырыатын «Кыталыына» трио кыргыттара ыллаатылар. Ньургустан Жирков Народнай поэт Моисей Ефимов хоһоонугар суруйбут «Нам кыыһа» ырыатын толордо Владимир Кудрин. Бэйэтин тылларыгар, матыыбыгар суруйбут «Саҥа дьыл» ырыатын автор Татьяна Гаврильева толордо.

Айар дьоҕурдаах, талааннаах дьоммут туһунан ыччаттарбытыгар, оҕолорбутугар үтүө санаа кыымын саҕан, кэпсээн номоҕо оҥостон тарҕатабыт!