Хама5атта5а А5а сыла cа5аланна.

Хамаҕаттаҕа Аҕа сыла cаҕаланна

Хамаҕатта нэһилиэгэр быйылгы Нэһилиэк күнэ уратытык буолан ааста. Ол курдук, олохтоох дьаһалта олунньу 8 күнүнээҕи дьаһалынан элбэх толкуй, кэпсэтии кэнниттэн нэһилиэккэ Аҕа сылын ыытарга быһаарыллыбыта. Онно олоҕуран олунньу 25 күнүгэр киэҥ программалаах бырааһынньык “Түһүлгэ” сынньалаҥ киинигэр тэрилиннэ. “Эркин” эр дьон түмсүүтэ(сал. орто оскуола учуутала, нэһилиэк депутата Захаров Р.А.) сарсыардаттан эр дьон дьарыгын көрдөрөр ”Эр киһи – эрэллээх эркин”диэн темалаан бэртээхэй быыстапканы “Чэгиэн эт-сиин. Туризм”, “Тутуу. Тутуу тэриллэрэ”, “Бултааһын. Булт тэриллэрэ”, “Балыктааһын. Балыктыыр тэриллэр”, “Хамаҕатта сүүрүк сылгылара”, “Араас оҥоһуктар” салааларга арааран туруорда. Быыстапка арыллыытыгар Дьокуускай куораттан “СР аҕаларын лигата” түмсүүттэн салайааччы Габышев А.И., түмсүү толорооччу директора Стрекаловскай А.И., специалист Барашков Д.Я., “Саха сирэ” хаһыат корреспондена Елена Потоцкая ыҥырыллан ыалдьыттаатылар. Нэһилиэккэ дириҥ суолталаах хамсааһын тахсыбытын биһирээн. сыаналаан бэлиэтээтилэр. Салгыы түөлбэлэр икки ардыларыгар “Аҕа уонна уол” 6 түһүмэхтээх күрэххэ 5 хамаанда кииристэ: “Кытылтан” Дьяконов В.Д. уолунаан Васялыын уонна Захаров Р.А. уолунаан Дуоланныын, “Хардыы” түөлбэттэн Брызгалов И.П. уолунаан Айталлыын, “Үрдэлтэн” Заболоцкай И.И. уолунаан Максимныын, “Сайдамтан” ини-бии Афанасий, Проня Степановтар. Бэйэни билиһиннэриигэ, боппуруоска эппиэттээһиҥҥэ Захаровтар, мас суоруутугар Брызгаловтар, мас эрбээһинигэр, хайытыытыгар, сааһылааһыныгар Дьяконовтар, биатлоҥҥа Заболоцкайдар чорбойдулар. Түмүккэ Заболоцкайдар кыайыылаах, Дьяконовтар иккис, Захаровтар үһүс миэстэлэри ылан улуустааҕы күрэххэ барарга мэктиэлэннилэр. Күрэҕи спортинструктор Уодай В.Г. тэрийэн ыытта. Бу кэмҥэ олохтоох ОДьКХ коллектива (сал.Кудрин Е.Е.) кутаа оттон улахан олгуйдарга собо миинэ буһаран, саха мааны аһынан кэлбит киһини барытын үөрэ-көтө дэлэччи күндүлээтилэр. Бу түгэннэргэ дьон бөҕө сырытта, ордук эр дьон хото кэлбиттэр.

Нэһилиэк Күнүн үөрүүлээх чааһа, Аҕа сылын биллэрии “Түһүлгэ” сынньалаҥ киинигэр Өрөгөй ырыанан, баһылык Максимов И.Н. эҕэрдэ тылынан саҕаланна. Иван Николаевич Аҕа сылын ыытыы эр дьон статуһун үрдэтиигэ, кинилэр ис кыахтарын муҥутуурдук арыйыыга уонна туһаныыга, аҕалар II-с сийиэстэрин дьоһуннаахтык көрсүүгэ туһуланарын тоһоҕолоон эттэ. Аҕалар хас биирдии ыал киэн туттар эрэллээх эркиннэрэ, инники кэскиллэрэ буоларыгар былааннаах үлэ барыаҕын иһитиннэрдэ, нэһилиэк инники сайдыытыгар, олоҕун оҥостуутугар эр дьоҥҥо эрэнэрин биллэрдэ. Нэһилиэк бүттүүн түмсэр дьоро киэһэтигэр элбэх киһи, бастыҥ общественниктар араас наҕараадалары туттулар, анал ааттары ыллылар. Улуус дьаһалтатын аатыттан улуус баһылыгын экономика салаатыгар солбуйааччы Обутова М.В., “Нам улууһа” МТ тыа хаһаайыстыбатыгар уонна предпринимательствоҕа солбуйааччы Гоголев Е.Е. ыалдьыттаатылар, эҕэрдэлэрин тиэртилэр. “Эркин” эр дьон түмсүү салайааччыта Захаров Р.А., нэһилиэк баһылыгын солбуйааччы Олесов К.А. эҕэрдэҕэ кыттыһан сыллааҕы үлэ былаанын билиһиннэрдилэр. Үөрүүлээх тэрээһин нэһилиэк тэрилтэлэрин холбоһуктаах концерынан түмүктэннэ.

Хас биирдии бырааһынньык кыттыылааҕар өйдүү-саныы сылдьарыгар логотиптаах уруучука, нэһилиэк гербэтэ ойуулаах халандаар, флажок, нэһилиэк “Саҥа саҕахтар” хаһыат олунньутааҕы нүөмэрэ бэлэх оҥоһулунна. “Хамаҕатта – мин дойдум” өйдөбүл өссө күүскэ иҥэригэр, хас биирдии олохтоох киэн туттарыгар чиҥ хардыы оҥоһулунна. Хамаҕаттаҕа Аҕа сыла саҕаланна.

Информацияны бэлэмнээтэ "Эҥсиэли" хаһыат корреспондена

М.Г. Винокурова