Руслан Захаров айар улэтэ.

Муус устар 25 күнүгэр Намнааҕы история уонна этнография музейыгар Хамаҕатта нэһилиэгин уус-уран самодеятельность актыыбынай кыттыылааҕа, мелодист, нэһилиэк депутата, нэһилиэк "Эркин" аҕаларын түмсүүтүн салайааччыта, СР үөрэҕириитин туйгуна Руслан Афанасьевич Захаров айар үлэтин быыстапкатын дьон дьүүлүгэр таһаарда.

Быыстапка хайысхата: Туой иһити түҥ былыргылыы оҥорон көрдөрүү уонна ол иһиккэ астаан тургутан көрүү.

"Түһүлгэ" сынньалаҥ киин үлэһиттэрэ оччотооҕу тыыны биэрэн кырыымпаҕа оонньоон, Руслан Афанасьевич суруйбут "Туой тойуга" номоҕун ааҕан кыттыыны ыллыбыт.

Биһиги нэһилиэкпит, Хамаҕатта, талааннар үүнэр - сайдар биһиктэрэ буоларын бу ураты эйгэлээх тэрээһин өссө биирдэ бигэргэттэ!

«БуорТуой» тойугун туһунан номох.

Руслан Захаров

Түҥ былыргыттан сиэттэрэн,

Сах саҕаттан салҕанан,

Өбүгэ үгэһин утумнаан,

Төрүт туойбутун сөргүтэн,

Туой тойугун туойабын...

Биир үтүө күн Буортуой улаатан, билиэн-көрүөн, дьоҥҥо туһалыан баҕарарын, ийэтигэр биллэрбит:

- Ийэ сир, мин убайым Күөстуой курдук дьоҥҥо туһалыахпын баҕарабын.

Онуоха ийэтэ:

- Оҕом барахсан, Буортуой, мин этэр тылбын иһит. Сэттэ сиэри тоҕус туому тулуйан тутустаххына буһан-хатан убайыҥ Туойкүөс саҕа буолан киһи-аймахха туһалыаҥ, орто дойдуну, үөһээ дойдуттан араҥаччылатыаҥ, аллараа дойдуттан көмүскүөҥ.

- Бастатан туран, наһаа мэниккин. Истигэн буолуохтааххын. Ылҕанан ыраастаныы сиэрин бараҕын.

- Иккиһинэн, Улахан эдьиийбэр

Эбэ ууга сайҕанан, сууйуллан

Санааҕын сааһыланаҕын.

- Үсүһүнэн, Өбүгэлэргиттэн күүс - эттик уктаҥҥын,

Уоттан куттаммат куттаах,

Уулуун ууруурҕаһар удьуордаах,

Салгынтан саллыбат санаалаах эрэх - турах буолаҕын!

-Төрдүһүнэн, Имиллэн-мускуллан,

Эттэнэн-эллэнэн,

Баҕалаах барылгын батыһан,

Боччуук буолан болтойоҕун