Сайдам ыал -2017

Аан дойдуга дьиэ кэргэн күнүн чэрчитинэн ыам ыйын 26 күнүгэр "Түһүлгэ" сынньалаҥ киинигэр, үгэскэ кубулуйбут Нам кэскиллээх эдэр ыалларын икки ардыларыгар ыытыллар "Сайдам ыал" күрэх улууска быйыл 10 төгүлүн ыытылынна. Бу күрэх аан бастаан 2006 сыллаахха, СР культуратын туйгуна Вера Васильевна Колпашникова көҕүлээһининэн ыытыллыбыта. "Сайдам ыал" күрэх Дьиэ кэргэн духуобунай сыаннастарын үрдэтэр, дьиэ кэргэни түмэр, тыа сирин кэскиллээх саха сайдам ыалларын үксэтэр, өйүүр сыаллаах улууска сыл ахсын үрдүк таһымнаахтык ыытыллар. Өбүгэ үтүө үгэстэрин сиэрин-туомун толоруу, олоҕу кытары тэҥҥэ сайдыы, чэгиэн-чэбдик туруктаах буолуу, чөл олоҕу тутуһуу, саха удьуорун ууһатар кыахтаах ыччаты иитии. Бу, Саха омук тулхадыйбат тутула баайа, хас биирдии ыал сирдээҕи анала-дьоло буолар!

"Сайдам ыал-2017" күрэх аһыллытыгар Хамаҕатта нэһилиэгин уус - уран самодеятельность, спорт биир бастыҥ актыбыыстара, ыллыыр талааннах түөрт бииргэ төрөөбүттэр Надежда Строева, Екатерина Заболоцкая, Степан , Сандр Находкиннар ырыанан эҕэрдэлээн арыйбыттара сүрдээх иэйиилээх уонна долгутуулаах буолбута. бу курдук Хамаҕатта нэһилиэгэ ырыа-үҥкүү аргыстаах талааннах дьиэ кэргэттэринэн киэн туттар, дьоҥҥо-сэргэҕэ астына сырдатар.

Дьүүллүүр сүбэ хамыыһыйатыгар үлэлээтилэр:

1. Вера Васильевна Колпашникова - улуустааҕы "Сайдам ыал" күрэх автора, Пр.Пр.Ядрихинскай аатынан олоҥхо киинин директора, дьүүллүүр сүбэ преседателэ.

2. Олесов Касьян Афанасьевич - Хамаҕатта нэһилиэгэ МТ баһылыгын солбуйааччыта;

3. Жергина Юлия Петровна - дьиэ кэргэн уонна ыччат управлениятын сүрүннүүр специалиһа;

4. Алексей Карлович Кривогорницын - А.Ф.Шестаков аатынан сынньалаҥ киинин сэбиэдиссэйэ;

5. Васильева Анна Сергеевна - ыччат уонна дьиэ кэргэн социальнай, психологическай өйөбүлүн киинин сэбиэдиссэйэ.

Улуустааҕы күрэх 6 түһүмэхтээх:

1. "Дьиэ кэргэн дьолун кистэлэҥэ"- бэйэни билиһиннэрии

2. "Интеллектуальнай викторина"- бэриллибит боппуруостарга эппиэттээһин

3. "Физкультура уонна спорт-чөл олох төрүөтэ"- спортивнай нүөмэр;

4. Проект көмүскээһинэ;

5. "Кэрэ дьүөрэлэһии" - вальс үҥкүүтүгэр киэһээҥҥи былааччыйаны көрдөрүү;

6. "Дьиэ кэргэн үгэһэ" - дьиэ кэргэттэр дьоҕурдарын көрдөрөр быыстапка.

"Сайдам ыал-2017" күрэх кыайыылаахтарынан таҕыстылар Хамаҕатта нэһилиэгиттэн Сардаана, Никон Никитиннэр дьиэ кэргэнэ.