О5о аймах сынньалан площадкатын уеруулээх аhыллыыта.

От ыйын 19 күнүгэр Хамаҕатта нэһилиэгэр олус күүтүүлээх күн үтүөтэ үүммүтэ.

Күнтэн-күн улаатан, сайдан иһэр оҕолорбут актыыбынай сынньалаҥнарын сөхтөөхтүк атаарар, эт-сиин өттүнэн сайдарыгар, үөрэ-көтө аралдьыйарыгар, сынньанарыгар оҕо-аймах площадкатын аһыллыыта, кэрэ мичээр аргыстаах буолан ааста.

Тутууну "Светлое будущее в 2017году" бырайыак чэрчитинэн Местников Сергей Васильевич генеральнай директордаах "Целевой фонд будущих поколений" РС(Я) коммерческайа суох тэрилтэ сакаастаан туттарда. Владивосток куораттан Пушкарева Ирина Владимировна директордаах "Хэппи Айленд" ООО тэриллэринэн хааччыйда уонна тутан биэрдэ.

"СР инники көлүөнэтин сайдыыта" сыаллаах фондаҕа Хамаҕатта нэһилиэгин олохтоохторун махтала муҥура суох. Ол курдук 2014 сыллаахха аныгылыы бырайыактаммыт "Эрчим" спортивнай комплексы үбүлээн туттарбыта. Бу нэһилиэк социальнай-экономическай сайдыытыгар төһүү күүс буолла. Күҥҥэ, ортотунан, 140 оҕо, ыччат, саастаах дьон араас спорт көрүҥнэринэн дьарыктаналлар, эрчиллэллэр, иллэҥ кэмнэрин туһалаахтык атаараллар.

Хамаҕатта нэһилиэгин аҕа баһылыга Максимов И.Н. эҕэрдэлээтэ музыка доҕуһуоллаах ыҥырыылаах ыалдьыттарын:

- Владивостоктааҕы "Хэппи Айленд" ООО директорын И.В. Пушкареваны, "Инники көлүөнэ сайдыыта" сыаллаах фонд сүрүннүүр специалиһа И.Е. Иванову, Нам улууһун баһылыгын тутууга уонна олох-дьаһах хаһаайыстыбатыгар солбуйааччы С.С. Местниковы, улуус экономика управлениятын салайааччыта М.В. Обутованы, улуус үп салаатын салайааччыта П.И.Аргунованы уонна "Целевой фонд будущих поколений" РС(Я) коммерческайа суох тэрилтэ генеральнай директорыгар С.В. Местниковка, нэһилиэк баһылыгар И.Н. Максимовка улуус баһылыгын махтал суруктарын уонна бэлэхтэрин туттарда. Оҕо аймах ырыата-тойуга, үөрүүлээх эҕэрдэтэ дьиэрэйдэ. "Тупсууна" эдэр ийэлэр түмсүүлэрин аатыттан Анна Петрова үчүгэй тутуу барбытын, өссө да маннык оҕоҕо анаммыт тупсаҕай бырайыактар олоххо киирэ туралларын баҕарда.

Бу сиэдэрэй тутуу туолуоҕа көрдөөх оҕо күлүүтүнэн, чуопчаарар оҕо саҥатынан. Остуоруйаҕа курдук омуннаах кырачааннарбытыгар бэлэхтиэҕэ дьоллоох оҕо сааһы, көрдөөх-нардаах умнуллубат кэрэ-бэлиэ түгэннэри, үгүс элбэх доҕоттору-атастары диэн эрэнэбит!