Улуу Октябрьскай революция 100 сыллаах үбүлүөйэ

Сэтинньи 6 күнүгэр "Өктөөп суһума үйэлэргэ сөҕүрүйбэт"! - Улуу Октябрьскай революция буолбута 100 сыллаах үбүлүөйэ өрө көтөҕүллүүлээхтик ааста. Үөрүүлээх, күргүөмнээх олоҕу, ааспыты ахтар - саныыр тэрээһиммитин "Барахсаана" биир көлүөнэ түмсүү көҕүлээн, администрация, кулууп кыттыһан ыыттыбыт.

Бу күн оччотооҕу кэми санатан нэһилиэкпит тэрилтэлэрэ, общественнай түмсүүлэрэ сомоҕолоһон актыыбынай кыттыыны ыллылар, үбүлүөйдээх тэрээһиммит сэргэхтик барда. «Улууп Өктөөп – өйтөн сүппэт” быыстапката, оччотооҕу ырыалар, үҥкүүлэр, буфет тэриллибитэ, хас биирдии кэлбит киһиэхэ оҕо сааһын, эдэр сааһын ааспыт кэрэ кэмнэрин санатта.

Ыалдьыт буолан бу кү ыҥырыллыбыттара, араас кэмнэргэ Хамаҕатта нэһилиэгин исполкомун председателинэн үлэлээбит дьоммут:

1960 – 1970 сылларга ыччат, комсомол лидерэ. Олох сайдар тускулун тутуспут, үүнүү, өрө көтүү өрөгөйдөөх суолунан нэһилиэк Сэбиэтин исполкомун председателинэн үлэлээбит Данилов Николай Данилович;
Ис - иһиттэн культуралаах, нэһилиэгин дьонун санаатын үрдүктүк тутар, холку майгылаах, үрүҥ - хара үлэ диэн араарбакка үлэһиттэрин кытта тэбис - тэҥҥэ сылдьан үлэлээн, үлэ арааһын тэрийбит, нэһилиэк культурнай олоҕор болҕомтотун уурбут, ирдэбиллээх салайааччы, 1979 - 1983 сылларга нэһилиэк Сэбиэтин исполкомун председателинэн үлэлээбит Васильев Иван Касьянович;
Захаров Николай Дмитриевич төрөөбүт дойдутугар кэлэн, нэһилиэк Сэбиэтин исполкомун председателинэн үлэлээбитэ. Уларыйыылардаах сылларга нэһилиэк Сэбиэтин, наһилиэк администрациятын түүрэ тутан ыытыллыбыт кэмнэрэ кини үлэлиир кэмнэригэр түбэспитэ. Туһаныллар сири хаһаайыстыба быһыытынан түҥэтии, нэһилиэк сирин - уотун, кыраныыссатын быһаарсыы , нэһилиэк административнай баһылыга Захаров Николай Дмитриевич быһаччы кыттыытынан уонна быһаарыытынан ыытыллыбыта. Салайааччы, тэрийээччи быһыытынан, дьону түмэ тардан үлэлээн, үүнэн , сайдан, улуус биир бастыҥ нэһилиэгэр Хамаҕаттатын тиэрдиспитэ.
1989 - 1993 сылларга Хамаҕатта нэһилиэгин Сэбиэтин исполкомун председателинэн талыллан үлэлээбит.Төрөөбүт нэһилиэгэр –Хамаҕаттаҕа тэрийэр - маассабай, культурнай социальнай боппуруостарга киэҥ, кэскиллээх , кэрэхсэнэр тэрээһиннэри табыгастаахтык тэрийбит, культураны, спорду күүскэ өйөөбүт, үрдүк таһымҥа таһаарбыт талааннаах, айымньылаах үлэлээх салайааччы Дунаев Александр Григорьевич

Нэһилиэкпит баһылыга Максимов И.Н. Өктөөп 100 сылынан үбүлүөйнэй мэтээллэри тыыл, үлэ ветераннарыгар дохсун ытыс тыаһынан туттарда.