Хамаҕатта ыһыаҕар Ытык Дуоҕа туруорулунна

Хамаҕатта олохтоохторун көмөлөрүнэн тупсарыллан оҥоһуллубут “Ыһыах ыспыт” пааркаҕа бэс ыйын 23 күнүгэр сайыны көрсөр үрүҥ тунах ыһыах ыһылынна.

Аан маҥнай буоларын курдук, ыһыах “Дойдум, сирим, айылҕам арчыллыыр күүстэрэ” сиэр-туом, алгыс этиллиитинэн аһылынна, саҕаланна. Сиэр-туом, алгыс этиллибитин кэнниттэн “Күн уотугар көмүс дуйунан күлүмнүү оонньоото Ыһыахпыт бэлиэтэ – Ытык Дуоҕа” диэн Ытык Дуоҕаны туруоруу сиэрэ-туома ыытылынна, нэһилиэк Аҕа баһылыга Иван Максимов эҕэрдэ тыл эттэ.

Быйылгы сайыны көрсөр ыһыах сиэрэ-туома оҥоһуллубутун, толоруллубутун кэнниттэн, “Түһүлгэ” норуот айымньытын киинин үлэһиттэрэ олохтоохторго “Өбүгэ дэлэй бэлэхтэрэ, саха омугун салҕанар үктэллэрэ” диэн кэнсиэр бэлэх ууннулар.

“Ыһыах дэлэй түһүлгэтэ” түһүлгэлээн олорооһун кэнниттэн тойуксуттарга “Кылыгырыыр кылыһах дуораана”, оһуохай тылын этиитигэр, таһаарыытыгар “Омоҕой оһуокайа, Эллэй эһиэкэйэ” уонна хомуска оонньооччуларга “Хомус хоҥкунуур тойуга” диэн күрэхтэр утуу-субуу салҕанан бардылар. Ону тэҥэ, “Ыһыахха кэтэр ытык таҥас буолар ыйаахтаммыт, оонньууга кэтэр ойуу таҥас буолар оҥоһууламмыт” уонна “Эйэ дэмнээх олохтоох эбээлээх эһээ” диэн көрүү күрэхтэр буоллулар. Бэлиэтээн эттэххэ, ыһыахха буолан ааспыт көрүүлэргэ дьон-сэргэ көхтөөхтүк кыттан күрэхтэр олус сэргэхтик аастылар.

Күрэхтэри көрүү кэмигэр эдэр дьоҥҥо, күүстээхтэргэ, сымсаларга, быһыйдарга “Эти-хааны чиҥэтэн, өйү-санааны күүһүрдэн” (“Үс төгүл үс” атах оонньуута, тутум эргиир, хапсаҕай) диэн ааттаах-суоллаах спортивнай күрэхтэһии ыытылынна.

Хамаҕатта 2019 сыллааҕы ыһыаҕар күндү ыалдьыттарынан буоллулар – Саха өрөспүүбүлүкэтин үтүөлээх үлэһитэ Степан Васильев уонна Людмила Спиридонова – Сунтаар Күөрэгэйэ. Ол курдук хамаҕатталар “Эһиэхэ, кэрэни этээри” диэн ырыа алыптаах түһүлгэни үөрэ-көтө көрдүлэр.