Хамаҕаттаҕа үтүө киһиэхэ анаммыт кинигэ сүрэхтэннэ

“Түһүлгэ” норуот айымньытын киинигэр Хамаҕатта дьонугар-сэргэтигэр балаҕан ыйын 27 күнүгэр Ларионов Егор Михайлович кэргэнигэр Степанида Степановна Ларионоваҕа анаан таһааттарбыт кинигэтин сүрэхтэниитэ үрдүк таһымҥа буолан ааста. Санатан эттэххэ, Степанида Ларионова быйыл Орто дойдуга суох буолбута биир сыла.

Ол курдук бу күн Степанида Ларионова чугас аймахтара, дьиэ кэргэнин табаарыстара, доҕотторо, бииргэ үөрэммит оҕолоро, нэһилиэк олохтоохторо кини сирдээҕи олоҕун туһунан ахтан-санаан аастылар. Хамаҕатта нэһилиэгин икки оскуолатын үөрэнээччилэрэ тэрээһиҥҥэ сылдьаннар, Степанида Степановна туһунан чуумпуран олорон истибиттэрэ элбэҕи этэр.

Тэрээһини, киирии тылы Степанида Степановна быраата, улуустааҕы “Эҥсиэли” хаһыат сүрүн эрэдээктэрэ Владислав Касьянов эттэ. Владислав Гаврильевич эдьиийин туһунан истиҥ-иһирэх тылларынан аҕынна, кэпсээтэ.

Егор Ларионов кэргэнин хайдах курдук истиҥник саныырын, убаастыырын уонна таптыырын буолбут тэрээһин көрдөрөн эрдэҕэ. Түмүккэ, Егор Михайлович дьоҥҥо-сэргэҕэ, “Түһүлгэ” норуот айымньытын киинин үлэһиттэригэр махтанарын биллэрдэ.

Егор Михайлович Ларионов – Нам улууһун, Салбаҥ, Хамаҕатта нэһилиэктэрин бочуоттаах олохтооҕо. Санатан эттэххэ, Егор Ларионов Ил Түмэн мунньаҕар икки созывка бэрэссэдээтэлинэн талыллан үлэлии сылдьыбыта.

Тэрээһин бүтүүтэ, кинигэ сүрэхтэниитигэр сылдьыбыт дьон Степанида Степановнаҕа анаммыт кинигэни хото ылан бардылар. Салҕыы, ыалдьыттары “Кэскил” балаҕан мааны астаах остуолугар ыҥырдылар.

Ол курдук “Түһүлгэ” норуот айымньытын киинэ уһун сайыҥҥы сынньалаҥ кэнниттэн үлэтин саҕалаата.