Хамаҕаттаҕа өрөспүүбүлүкэтээҕи оҕунан ытыы күрэхтэһиитэ буолла

Ааспыт өрөбүллэргэ Нам улууһун Хамаҕатта нэһилиэгин “Эрчим” спортивнай комплексыгар оҕунан ытыыга биирдиилээн бастыыр иһин өрөспүүбүлүкэтээҕи күрэхтэһии ыытылынна.

Күрэхтэһии Хамаҕатта нэһилиэгин олохтооҕо, Аҕа Дойду Улуу сэриитин кыттыылааҕа, В.И. Ленин аатынан колхоз бэрэссэдээтэлэ, үлэ ветерана Николай Николаевич Москвитин кэриэһигэр уонна Улуу Кыайыы 75 сылын көрсө тэрээһиннэр чэрчилэринэн ыытылынна.

Өрөспүүбүлүкэтээҕи оҕунан ытыы күрэхтэһии үөрүүлээх арыллыытын Хамаҕаттатааҕы “Түһүлгэ” норуот айымньытын киинин үлэһиттэрэ иилээн-саҕалаан ыыттыбыт.

Ол курдук сэттэ улуустан айаннаан, кыттыыны ыла кэлбит спортсменнарга кыра театрализованнай сыана көрдөрүлүннэ. Салҕыы, фольклор жанрыгар специалист Оксана Кудрина, үҥкүү учуутала Алексей Дьячковский, Нам сэлиэнньэтин “Ньургуһун” народнай үҥкүү бөлөх уолаттара, Партизан нэһилиэгин “Дьүрүл” народнай фольклорнай ансаамбыл, Дмитрий Барабанов салайааччылаах Намнааҕы педколледж устудьуоннара, “Ретро-Данс” народнай баальнай коллектив үҥкүүлээн, ыллаан-туойан тэрээһини киэргэттилэр.

Күрэхтэһиигэ өрөспүүбүлүкэ сэттэ улууһуттан, Кыргызстан өрөспүүбүлүкэтиттэн, Забайкальскай кыраайтан, Дьокуускай уонна Нерюнгри куораттартан, суол-иис халтархайын аахсыбакка, элбэх күрэхтэһээччи кытта кэлбитэ кэрэхсэбиллээх уонна тыҥааһыннаах буолла.