Сайылык ыһыаҕа

Самаан сайын кэлбитинэн Хамаҕатта нэһилиэгин олохтоохторо сайылыкка көһөн тахсан саҕалаан эрэллэр. Ол курдук от ыйын 12 күнүгэр Убаһа Муммут алааска “Сайылык күнэ” ыһыах буолан ааста. Сылын аайы ыытыллар быйылгы “Сайылык күнэ” тэрээһин Хамаҕатта олохтооҕо, үлэ бэтэрээнэ, герой ийэ Елизавета Степановна Аргунова 80 сааһын кытта ситимнэннэ. Санатан эттэххэ, Ил Дархан Айсен Николаев тыа хаһаайыстыбатын үлэһиттэрин, төрүт үгэстэри сайыннарар, дьону көҕүлүүр сыаллаах «Сайылык күнэ» бэлиэтиир уурааҕа сэтинньи 6 күнүгэр 2018 сыллаахха тахсыбыта.

“Сайылык ыһыаҕа” күн урукку сылларга тигинэччи үлэлээбит Хамаҕатта нэһилиэгин үгүс сайылыктарыгар үрүҥ илгэни үрүлүппүт, эмис эти дэлэппит ыанньыксыттар, үлэһиттэр, оҕолор муһуннулар.

Бэлиэ күҥҥэ мустубут дьону-сэргэни, колхозка, совхозка үлэлээбит кэмнэригэр тыа хаһаайыстыбата сайдыытыгар сыралаах кылааттарын киллэрсибит, үөрэтээччи быһыытынан бастыҥнар кэккэлэригэр сылдьыбыт дьоһун үлэһиттэри Хамаҕатта нэһилиэгин баһылыга Иван Максимов, Нам улууһун тыатын хаһаайыстыбатын салайааччыта Владимир Макаров эҕэрдэ тыллары эттилэр. Үөрүүлээх ыһыаҕы “Түһүлгэ” норуот айымньытын киинин үлэһиттэрэ эҕэрдэ кэнсиэринэн киэргэттилэр.

Быйылгы сыл Саха сирин үрдүнэн Сомоҕолоһуу сылынан биллэриллибитинэн, кэлбит дьон хамаанда тэринэн сэргэх оонньууларга («Мас эрбээһинэ», «Сайылык кыргыттара», «Сайылык уолаттара» көрдөөх стартар, «Самовар өрүүтэ», «Саламааты буһарыы», мэһэйдэри туорааһын) көхтөөхтүк кытынна.

Сайылык — сахалар сайыҥҥы дьиэлэрэ. Сайылыктарга дьон тыа хаһаайыстыбатынан дьарыктаналлар. Холобура, оҕуруот аһын олордоллор, ынах-сүөһүнү туталлар.