Тыа хаһаайыстыбатын күнүгэр аналлаах тэрээһин

Хамаҕатта “Түһүлгэ” норуот айымньытын киинигэр алтынньы 25 күнүгэр Норуот тыатын хаһаайыстыбатын уонна үлэһиттэрин күнүгэр аналлаах дьаарбаҥка тэрээһин буолла. Бэлиэтээн эттэххэ, тэрээһин Хамаҕатта нэһилиэгин муниципальнай тэриллии тыатын хаһаайыстыбатын специалиһа, Саха Республикатын Тыатын хаһаайыстыбатын туйгуна Галина Габышева көҕүлээһининэн ыытылынна.

Ол курдук, бу күн Нам улууһун бэйэ оҥорон таһаарар бородууксуйатынан хааччыйар Ньургун Гуляев салайааччылаах “Эрэл” СХПК, ону таһынан, Хатыҥ-Арыы нэһилиэгиттэн Захар Винокуров салайааччылаах “Дьөһөгөй” бааһынай хаһаайыстыба, бэйэлэрин бородууксуйаларын атыыга таһаардылар. Ону тэҥэ, Хамаҕатта олохтоохторо, биирдиилээн кэтэх хаһаайыстыбалаахтар кытыыны ыллылар.

“Түһүлгэ” норуот айымньытын киинин үлэһиттэрэ тыа хаһаайыстыбатын туруу үлэһиттэрин уонна дьаарбаҥка кыттыылаахтарын ылбаҕай ырыа ыллаан, хомоҕой хоһоон ааҕан эҕэрдэлээтилэр. Ол курдук тыа хаһаайыстыбатыгар анаммыт тэрээһини, Екатерина Заболоцкая салайааччылаах, Е.М. Шапошников аатынан орто оскуола 4 кылааһын үөрэнээччилэрэ ыллам ырыанан аспыттарын дьон олус үөрэ, долгуйа иһиттэ. Салҕыы, жанр бары көрүҥэр үлэлэһэр специалист Надежда Макарова “Ийэкээм”, уус-уран салайааччы Татьяна Гаврильева “Кэрэ” ырыалары ыллаан эҕэрдэлээтилэр. Ону таһынан, тыа хаһаайыстыбатыгар анаммыт бэлиэ күҥҥэ, Сабарай Илгэ “Сааскы санаа” диэн хоһоонугар саҥа ырыа сүрэхтэнэн ылланна.

Атыы-эргиэн дьаарбаҥкатыгар Саха Республикатын үтүөлээх артыыһа, көр-күлүү маастара, биир дойдулаахпыт Валентина Чиркова ыалдьыттаан дьон сүргэтин көтөхтө. Ону тэҥэ, Хамаҕатта нэһилиэгэр дьэдьэн олордуутунан, эмтээх отторунан дьарыктанар, ветеран биолог учуутал Валерия Кривошапкина бар дьоҥҥо туһалаах сүбэлэри биэрдэ.

Дьаарбаҥка кэмигэр “Үтүө санаа” акция үлэлээтэ. Нэһилиэк икки элбэх оҕолоох ийэтигэр (сэттэ оҕолоох Ньургуйаана Эверстова уонна алта оҕолоох Ньургуйаана Максимова) ас бородууктата туттарылынна.