Француз тылын учууталын күнүгэр “Fa-ci-la chanter!” эҕэрдэ кэнсиэр ыытылынна

Хамаҕаттатааҕы “Түһүлгэ” норуот айымньытын киинигэр сэтинньи 23 күнүгэр Норуоттар икки ардыларынааҕы француз тылын учууталын күнүгэр аналлаах “Fa-ci-la chanter!” диэн эҕэрдэ кэнсиэр буолан ааста.

Эҕэрдэ кэнсиэр сүрүн ыалдьыттарынан лицей мецената Франсин Обри уонна кини уола Александр Обри буоллулар. Хамаҕатта олохтоохторо, кэнсиэргэ кэлээччилэр Франсин Обри туруорбут “Дети Мира” диэн хаартыска быыстапкатын сэҥээрэ, хайҕыы көрдүлэр. Бэлиэтээн эттэххэ, дьоро киэһэ сахалыы уонна француз тылынан ыытыллыбыта олус истиҥник көһүннэ. Икки тылынан барбыт кэнсиэргэ лицей выпускниктара Наталья Булдакова, Наталья Пинигина, Николай Жирков уонна Дмитрий Попов француз тылынан ыллааннар кэнсиэри астылар. Салҕыы, “Кытыл Кыыма” ансаамбыл, “Ретро-Данс” үҥкүү народнай ансаамбыла киэргэтэннэр өссө тупсаран биэрдилэр. Бу күн саха-француз лицейыгар омуктуу тылга оҕолору үөрэтэр Арольд Може Хамаҕатта олохтоохторугар өссө төгүл үс тылынан ырыа ыллаан иһитиннэрэн, дьон биһирэбилин ылыан ылла. Ону таһынан, кини үөрэнээччилэрэ француз ырыаларын тылыттан тылыгар түһэрдилэр.

Оскуолаҕа урукку сылларга үлэлээбит, сүрүн кылааттарын киллэрсибит учууталлар, күүс-көмө буолбут убаастабыллаах дьоннор бэйэлэрин баҕа санааларын эттилэр, тылларын иһитиннэрдилэр.