"Ретро-Данс" үлэтэ үрдүк таһымҥа сыаналанна

“Түһүлгэ” норуот айымньытын киинин иһинэн үлэлиир “Ретро-Данс” үҥкүү народнай ансаамбыла сэтинньи 26 күнүгэр “Народнай” аатын көмүскүүр, отчуоттуур кэнсиэрэ бэрт тэрээһиннээхтик ыытылынна. Санатан эттэххэ, “Ретро-Данс” ансаамбыл 2006 сыллаахха тэриллэн айар үлэтин саҕалаабыта. Ансаамбыл салайааччыта Любовь Андросова буолар.

Народнай ансаамбыл аатын көмүскүүр кэнсиэригэр Хамаҕатта олохтоохторо, үҥкүү сүгүрүйээччилэрэ көтүү тэҥэ кэрэ Вальс, наҕыл Танго онтон да атын кэпсээн курдук бииртэн биир кэрэ үҥкүүлэри көрөн толору астыныыны, сынньаныыны, дуоһуйууну ылан бардылар.

Бу күн “Ретро-Данс” ансаамбылы Өрөспүүбүлэкэтээҕи норуот айымньытын дьиэтин социальнай культурнай технология салаатын сэбиэдиссэйэ Алексей Захаров бэрэсэдээтэллээх хамыыһыйа көрдө-иһиттэ. Хамыыһыйаҕа киирдилэр: Дьокуускайдааҕы оҕо дыбарыаhын уус-уран салайааччыта, Саха Өрөспүүбүлэкэтин үөрэҕириитин, култууратын уонна ыччат политикатын туйгуна, уопсай үөрэхтээhин бочуоттаах үлэhитэ, Николай Терютин; Саха Өрөспүүбүлэкэтин култууратын туйгуна, Өрөспүүбүлэкэтээҕи норуот айымньытын дьиэтин социальнай култуурнай технология салаатын специалиhа, Анастасия Аммосова уонна Саха Өрөспүүбүлэкэтин култууратын туйгуна, Өрөспүүбүлүкэтээҕи норуот айымньытын дьиэтин социальнай култуурнай технология салаатын специалиhа, Жанна Жиркова састааптаах дьүүллүүр хамыыhыйа тургутуутун үчүгэйдик ааста.

Хамыыһыйа “Ретро-Данс” үлэтин олус үчүгэйдик ылынан сыаналаата. Хас биирдии хамыыһыйа чилиэнэ ансаамбыл уһуйааччытын Любовь Алексеевнаны, үҥкүүһүттэри бэрт диэн хайҕаан, тыл бастыҥын эппиттэриттэн хамаҕатталар олус диэн астыммыттара, биир киһи курдук үөрбүттэрэ.