Хамаҕаттаҕа Нам улууһугар Байанай сылын түмүктүүр, Байанай ыйыгар анаммыт улахан тэрээһин буолан аас

Хамаҕаттатааҕы “Түһүлгэ” норуот айымньытын киинигэр ахсынньы маҥнайгы күнүгэр Нам улууһугар Байанай сылын түмүктүүр, Байанай ыйыгар анаммыт “Байанайбыт тосхойдун” диэн ааттаах-суоллаах улуус булчуттарыгар улахан тэрээһин буолан ааста.

Бу күн сарсыардааҥҥы өттүгэр дьон-сэргэ көрүүтүгэр хаартысканан быыстапка, көтөр-сүүрэр экспонаттара (таксидермия), бултаммыт айылҕа (трофей) кыылларын муостара турдулар. Манна баар этэ, балык эгэлгэтин атыыта, “Саамай улахан собо”, “Саамай улахан алыһар” күрэхтэрэ. Ону тэҥэ, собо сиэһинигэр “Аһастаах дьон” күрэх ыытылынна.

Күн иккис аҥаарыгар улуус булчуттарын, балыксыттарын уопсай мунньаҕа ыытылынна. Салҕыы, тимир уустарын быыстапката турда.

Киэһэ, мустубут булчуттарга, балыксыттарга “Үҥкүүлээ” телепроект полуфиналистара, Хамаҕатта нэһилиэгин “Айыы Хотун” үҥкүү бөлөҕө, “Түһүлгэ” норуот айымньытын киинин уус-уран салайааччыта Татьяна Гаврильева уонна Саха сирин эстрадатын артыыһа Иннокентий Васильев-ЛЭГЭНТЭЙ эҕэрдэ кэнсиэр бэлэх ууннулар. Кэнсиэр кэмигэр, булду интэриэһиргиир бары эр дьоҥҥо булка сыһыаннаах, туһалаах тэриллэр оонньоннулар, ону таһынан сүрүн бириистэр – ПВХ тыы, балыксыт балаакката уонна кыра калибрдаах ЧЕЗЕТ саа буоллулар.