Хамаҕаттаҕа күүтүүлээх Саҥа Дьыл

Саҥа дьыл – Аан Дойду үрдүнэн киһи аймахха саамай сүрүн күүтүүлээх, үөрүүлээх уонна аптаах бырааһынньык буолар. Саҥа дьыл – үгүс дьоҥҥо дьикти кэм, сорох ардыгар остуоруйаҕа төрөппүт оҕотунааҕар быдан наадыйааччы. Хамаҕатта нэһилиэгэр ахсынньы 31 күнүгэр “Түһүлгэ” Норуот айымньытын киинигэр олохтоохторго уонна ыалдьыттарга айар куттаахтар, ыччаттар уонна оҕолор бэрт үчүгэй ис хоһоонноох остуоруйа айымньытын оонньоон, үҥкүүлээн көрдөрдүлэр.

2020 сыл үүнэр дьоро киэһэтигэр көрөөччүлэр, ыалдьыттар “Бу барыта биир кутуйахтан саҕаламмыта” диэн аптаах остуоруйаҕа бүтүннүү киирдилэр. Ол курдук туруоруу айымньыга сахалыы “Күөрэгэй” остуоруйаттан саҕалаан киһи эрэ барыта биһирии, хайҕыы көрбүт, үгүс норуоттарга киэҥник биллибит араас остуоруйалар, мультиктар геройдара киирбиттэрэ олус кэрэтик көстөн дьон биһирэбилин уонна хайҕабылын ылыан ылла. Бэлиэтээн эттэххэ, бу көстүү, остуоруйа тохсунньу 6 күнүгэр ыраахтан-чугастан кэлбит Хамаҕатта ыалдьыттарыгар хаттаан көрдөрүллүбүтэ.

Саҥа дьыл бырааһынньыктарын кэмигэр “Түһүлгэ” Норуот айымньытын киинэ тохсунньу маҥнайгы, иккис, төрдүс уонна алтыс күннэригэр уоттаах-күөстээх дискотекалары оҥорон ыытта. Биир оннук биэчэртэн тохсунньу 2 күнүгэр Хамаҕатта нэһилиэгэр сүҥкэн суолталаах “RAVE-ТУСА” бэчэриинкэ киэһэтэ буолан ааста. Дьоро киэһэни иилээн-саҕалаан ыытта: ыытааччы MC Slavviiik, ону тэҥэ аныгы кэм сулустара Дьулустан Чуручанов, Саргылаана, IAN (Александр Иванов), NiggaShet (Анастасия Парфенова) араас ырыалары ыллаан бэлэх ууннулар, киэргэттилэр. Тоҕуоруһа мустубут ыччат дьоҥҥо DJ Dramatica, DJ Acidox араас хабааннаах ырыалары холбоон тыаһаттылар.