Хамаҕатта түөлбэлэрэ бииргэ мусталлар

Хамаҕаттаҕа тохсунньу 11 күнүгэр “Саҥа Дьыллааҕы үөрүүнү үөскэтиэххэ” диэн Саҥа дьыллааҕы тэрээһиҥҥэ нэһилиэк биэс түөлбэтэ түмсэн бэйэ-бэйэтин эҕэрдэлэстэ, үөрүүтүн үллэһиннэ, баҕа санаатын эттэ.

Аҕыйах сылтан бэттэх үтүө үгэскэ кубулуйбут түөлбэлэр көрсүһүүлэрин иилээн-саҕалаан “Түһүлгэ” Норуот айымньытын киинин салайааччыта Антонина Харитонова ыытта. Ыытыллыбыт күрэхтэһиилэргэ бары түөлбэ туора турбакка көхтөөх кыттыыны ылара киһини үөрдэр. Ол курдук Хамаҕаттаҕа биэс түөлбэ аныгы олоҕу кытта тэҥҥэ хардыылаан үлэлии-хамныы олорор. Санатан эттэххэ, “Үрдэл” түөлбэ салайааччыта Клара Семенова, “Кытыл” – Варвара Винокурова, “Хардыы” – Сардаана Андреева, “Сайдам” – Люция Ушницкая уонна “Арыы-Тиит” – Варвара Афанасьева.

Ол курдук ““Сыл Символа” Бастыҥ карнавальнай көстүүм” ааты “Үрдэл” түөлбэ олохтооҕо Анна Слепцова маскараата ылла. Оттон “Хардыы” түөлбэ бэйэтин остуолун бэрт үчүгэйдик, тупсаҕайдык киэргэтэн Саҥа Дьыллааҕы бастыҥ остуолунан ааттанна. Оттон эҕэрдэ тылы этээһиҥҥэ киирдэххэ, бастыҥ ураты быһыылаахтык “Кытыл” түөлбэ эҕэрдэлээтэ. Бэлиэтээн эттэххэ, “Кытыл” түөлбэ бэрэстэбиитэллэрэ толору эдэр ыччаттан турбута уратытык көһүннэ. ““Саҥа Дьыллааҕы бүлүүдэ” рецебын үллэһин” ааты “Хардыы” түөлбэттэн Анна Заровняева ылла. Саамай үчүгэй оҥоһуктары оҥорон “Саҥа Дьыллааҕы оҥоһук” аат “Сайдам” түөлбэҕэ ананна.

Бу күн биэс түөлбэ дьоно-сэргэтэ санаатын аһаҕастык толору эттэ, ырыаны, үҥкүүнү көҕүлүттэн тутта. Тэрээһини хамаҕатталар уопсай хаартыскаҕа түһүүнэн түмүктээтилэр.