Хамаҕатта талааннара “Туймаадалыын сулустаах киэһэҕэ”

Хамаҕатта нэһилиэгэр тохсунньу 18 күнүгэр “Туймаада” государственнай ырыа ансаамбыла сүрүн ыалдьытынан буолла. “Туймаадалыын сулустаах киэһэҕэ” “Түһүлгэ” Норуот айымньытын киинэ ыраахтан-чугастан дьону түмэ тарта. Тэрээһиҥҥэ Хамаҕатта талааннаах дьоно кыттыыны ылбыттара кэрэхсэбиллээх.

Ол курдук бу күн нэһилиэк баһылыга Иван Максимов Степан Иванов баянынан доҕуһуоллаах Лина Акимовалыын, Григорий Местников “Родина” ырыаны Андрей Шадринныын, Михаил Макаров “Туймаада” ансаамбыл эр дьонун кытта “Тымныы оҕуһа” ырыалары ыллаан толорбуттара биир дойдулаахтарын үөрдүөхтэрин үөртүлэр. Оттон “Кытыл Кыыма” ансаамбыл “Алааска” ырыаны олус иэйиилээхтик толордо.