Хамаҕаттаҕа Сашулялаах Тоша клоуннар ыалдьыттаатылар

Хамаҕаттатааҕы “Түһүлгэ” Норуот айымньытын киинигэр тохсунньу төрдүс күнүгэр оҕолорго аналлаах утренник буолан ааста.

Бу күн Дьокуускай куораттан кэлбит САШУЛЯЛААХ ТОША клоуннар оҕолорго Саҥа Дьыллааҕы ураты, дьикти умнуллубат күлүүнү-салыыны хааллардылар, бэлэхтээтилэр. Ону таһынан, артыыстар үгүс фокустары, цирковой этюдтары, мыыла күүгэнэ (шоу мыльных пузырей) уонна да үгүс нүөмэрдэри көрдөрдүлэр. Холобура, билиҥҥи араас аныгы мультиктар геройдара сыанаҕа тахсаннар оҕолору үҥкүүлэппиттэриттэн оҕолор да, төрөппүттэр да олуһун астыннылар. Ол курдук үгүс кырачаан бииргэ мустан араастаан хамсанарын-имсэнэрин, үтүктэн үҥкүүлүүрүн күн ахсын көрбөппүт.

Утренник, тэрээһин бүтүүтэ Моруос оҕонньор оҕолорго бэйэтин сэмэй бэлэхтэрин туттартаата. Хас биирдии төрөппүт оҕотун кытта харыйаҕа, клоуннары, сөбүлүүр геройдарын кытта хаартыскаҕа түстэ. Ону тэҥэ, клоуннар оҕолорго шаригынан араас формалары оҥороннор кырачааннар үөрүүлэрин өссө үксэттилэр. Оҕолор Саҥа Дьыллааҕы биир тэрээһиниттэн үгүс үчүгэйи көрөн дьиэлэригэр тарҕастылар.