Кыайыы 75 сылыгар бары тэрилтэ 75 тэрээһин тэрийиэ

Дойду үрдүнэн умнуллубат Албан Аат, Саха сиригэр Патриотизм, Нам улууһугар Ытык өйдөбүл уонна көлүөнэни утумнааһын сылларын Хамаҕаттатааҕы “Түһүлгэ” норуот айымньытын киинигэр олунньу 7 күнүгэр үөрүүлээхтик арыйдылар.

Хамаҕатта бары олохтоохторо, оскуола үөрэнээччилэрэ уонна тэрилтэ үлэһиттэрэ “Красная гвоздика – спутница тревог, Красная гвоздика – наш цветок” диэн ааттаан тураннар, “Кыайыы саллаатын” өйдөбүнньүк пааматынньыгар илииттэн оҥоһуллубут сибэккилэри уурдулар.

Хамаҕаттаҕа “Бу Кыайыы бары сир үрдүнэн уруйдан!” диэн Улуу Кыайыы 75 сылыгар аналлаах үөрүүлээх тэрээһини “Гвоздика” агитбригада сэрии сылларыгар бары күүстэрин, тыыннарын толук биэрбит биир дойдулаахтарын ахтан, ытыктаан уонна чиэстээн хоһоон ааҕан арыйда. Дьоро киэһэ ыалдьыттарыгар – Ытык кырдьаҕастарга, бар дьоҥҥо нэһилиэк баһылыга Иван Максимов бэйэтин эҕэрдэ тылын эттэ. Иван Николаевич Хамаҕаттаҕа Улуу Кыайыы 75 сылыгар аналлаах туох-ханнык үлэлэр, тэрээһиннэр ыытыллыахтаахтарын, буолуохтаахтарын сырдатта. Бу кэнниттэн, хас биирдии тэрилтэ сыл устата 75 араас хабааннаах тэрээһини оҥоруохтааҕын нэһилиэнньэҕэ эттэ. Ону тэҥэ, Мария Винокурова быйыл Хамаҕатта нэһилиэгин уоттаах сэрии кыттыылаахтарыгар, тыыл үлэһиттэригэр, сэрии сылын оҕолоругар аналлаах кинигэ тахсыытын туһунан иһитиннэриини оҥордо. Бэлиэтээн эттэххэ, тыыл уонна үлэ бэтэрээннэрин бииргэ мустубут кэмнэрин мүлчү туппакка уопсай хаартыскаҕа түһүүгэ ыҥырдылар. Бу хаартыска нэһилиэк историятыгар, кэнэҕиһин көлүөнэттэн көлүөнэҕэ хаалыаҕа диэн бигэ эрэллээхпит.

Түмүккэ, нэһилиэк айар куттаах дьоно-сэргэтэ “Кыайыы уот сулуһа, үйэҕэ сырдыы тур!” диэн ааттаах-суоллаах эҕэрдэ кэнсиэри бэлэх ууннулар. Олохтоохтор, тэрээһин бары кыттыылаахтара Кыайыы ырыаларын үтүө акциятыгар кыттыһан, биир дойдулаахпыт Илья Винокуров-Чаҕылҕан суруйбут, Саха сиригэр киэҥник биллэр ырыа буолбут хоһоонугар “ХАЙЫҺАР” ырыаны күргүөмнээхтик биир киһи курдук толордулар.

Бу күн култуура дьиэтигэр “Сахаяна” кафе амтаннаах аһа, полевой кухня амтаннаах астара остуолга тураннар үлэлээтилэр.