Хамаҕаттаҕа “Аҕалаах ийэбин ахтар буоламмын” айар киэһэ буолла

Олунньу 22 күнүгэр Хамаҕатта нэһилиэгин “Түһүлгэ” Норуот айымньытын киинигэр Улуу Кыайыы 75 сыла чэрчитинэн, улуустааҕы “Отуу уота” литературнай түмсүү бэрэссэдээтэлэ Александр Дунаев “Аҕалаах ийэбин ахтар буоламмын” диэн айар киэһэтэ буолан ааста.

Аан маҥнай Александр Дунаев айар быыстапкатын аһыллыыта буолла. Үөрүүлээх быыстапканы арыйыы лиэнтэтин Нам улууһун социалнай харалта тэрилтэтин салайааччыта Петр Абрамов, Хамаҕатта нэһилиэгин баһылыга Иван Максимов уонна Александр Дунаев кырыйдылар.

“Аҕалаах ийэбин ахтар буоламмын” айар киэһэ тэрээһин күндү ыалдьыттара, Хамаҕатта нэһилиэгин олохтоохторо Александр Дунаев айылҕа бэйэтэ оҥорон таһаарбыт дьикти мастарыттан, мутуктарыттан эбии чочуйбут, ойуулаабыт-мандардаабыт оҥоһуктарын, араас кэмнэргэ муспут альбомнарын уонна кинигэлэрин, үгүс сиэдэрэйи уонна интэриэһинэйи айбытын көрдүлэр-иһиттилэр. Ону тэҥэ, айар быыстапкаҕа мелодист сиэннэрэ уруһуйдаабыт уруһуйдара, оҥорбут оҥоһуктара турдулар.

Салгыы, быыстапка кэнниттэн, ырыа-хоһоон, кэпсэтии аргыстаах кэнсиэр буолла. “Аҕалаах ийэбин ахтар буоламмын” айар киэһэни иилээн-саҕалаан ыытта, библиотека үлэһитэ Марина Корякина. Кэнсиэргэ мелодист матыыптаабыт ырыаларын араас көлүөнэ дьон толордулар. Холобура, сиэнэ кыыс Розана дьүөгэлэринээн эһэтин тылларыгар уонна матыыбыгар “Учууталбар баһыыба” ырыаны ыллаатылар. Айар киэһэҕэ Дунаевтар дьиэ кэргэн көлүөнэ салгыы салҕанар диэн, бэйэлэрин дьиэ кэргэттэрин билиһиннэрдилэр уонна үҥкүү бэлэх ууннулар. “Аҕалаах ийэбин ахтар буоламмын” дьоро киэһэни “Түһүлгэ” сынньалаҥ киин салайааччыта Антонина Харитонова хоһоон ааҕан, дьон сүргэтин көтөҕөн түмүктээтэ.

Бу күн Александр Григорьевич чугас доҕоро, Саха сирин суруйааччыларын сойууһун бэрэссэдээтэлэ, Саха Республикатын народнай поэта Иван Мигалкин Нам улууһугар, Хамаҕатта нэһилиэгэр күндү мааны ыалдьыт буолла, бэйэтин тылын иһитиннэрдэ, олох туһунан кэпсээн сырдатта. Салгыы, СР суруйааччыларын сойууһун чилиэнэ, поэтесса Галина Басылайканова; СР суруйааччыларын чилиэнэ, самодеятельнай композитор, поэт, Нам улууһун Ытык киһитэ Иван Бубякин-Чөҥөчөк; Нам улууһун социалнай харалта тэрилтэтин салайааччыта Петр Абрамов; Хамаҕатта нэһилиэгин баһылыга Иван Максимов тыл бастыҥын, маанытын эттилэр. Бэлиэтээн эттэххэ, “Отуу уота” түмсүү чилиэттэрэ бэйэлэрин эҕэрдэлэрин хоһоон ааҕыытынан, ырыанан тиэрпиттэрэ бүгүҥҥү киэһэни өссө ордук тупсаран биэрдэ. Ол курдук бииргэ үөрэммит оскуолатааҕы доҕотторо уонна 1981 сыллаахха Александр Григорьевич кылаас салайааччылаах иитиллэн-такайыллан оскуола олоҕун түмүктээбит выпускниктара бары эҕэрдэҕэ кыттыһан үтүө тыллары эттилэр. Намнааҕы педучилищеҕа үөрэппит, Соттой этэрээти тэрийбит учуутал, Саха сирин биллиилээх худуоһунньуга Екатерина Павловна кэргэнинээн Федор Федорович Павловтыын долгуйан туран тыл эттилэр. Николай Рыкунов аатынан улуустааҕы библиотека уонна Нам улууһун култууратын управлениетын үлэһиттэрэ махтанан тураннар Александр Григорьевич бүгүҥҥү үөрүүлээх күнүнэн эҕэрдэлээтилэр.

Александр Дунаев Саха Республикатын култууратын үтүөлээх үлэһитэ, Нам улууһун, Хамаҕатта нэһилиэгин Бочуоттаах олохтооҕо, поэт, мелодист, художник, скульптор. Кини айар үлэҕэ дьиҥ ис сүрэҕинэн бэринэн туран үлэлиир, элбэх билиилээх-көрүүлээх, илиитин араарбакка көмүс бүрүөнэн суруйар, дьоҥҥо-сэргэҕэ ытыктанар СР суруналыыстарын чилиэнэ, 18 кинигэ автора.