Оҕолор ийэлэрин сааскы бырааһынньыгынан эҕэрдэлииллэр

Кулун тутар 7 күнүгэр “Түһүлгэ” Норуот айымньытын киинигэр Аан дойду Дьахталларын күнүгэр аналлаах “Ийээ, ыллаа миигин кытта” (“Спой со мною, мама”) диэн эҕэрдэ кэнсиэр буолан ааста. Бэлиэтээн эттэххэ, Хамаҕатта нэһилиэгэр оҕо ийэтинээн сыанаҕа тахсан ыллыыра аан маҥнайгытын ыытыллар.

Тэрээһини Анастасия Сивцева иитиллээччилэрэ “Радуга” үҥкүү бөлөх арыйда. Бу күн сыанаҕа Оксана Кудрина кыыһынаан Айыыналыын, Надежда Строева кыргыттарынаан Амелиялыын уонна Аэлиналыын, Маргарита Мокрощупова уолунаан Толялыын, Матрена Артамонова кыыһынаан Снежаналыын, Надежда Макарова уолунаан Петрдыын, Екатерина Заболоцкая кыргыттарынаан Настялыын уонна Наташалыын, Татьяна Уодай оҕолорунаан Нарияналыын уонна Айдынныын, Татьяна Гаврильева кыыһынаан Татьяна Протопоповалыын нэһилиэк олохтоохторугар умнуллубат түгэни бэлэхтээтилэр. Ону таһынан, ийэлэригэр анаан Соня Абрамова уонна Ратмир Зоиров биирдиилээн тахсаннар бэйэлэрин эҕэрдэ ырыаларын бэлэх ууннулар. Салгыы, Саргылана Назарова уолунаан Максимныын гитара доҕуһуоллаах “Ийэҕэ махтал” ырыаны ыллаатылар.

Ол курдук “Ийээ, ыллаа миигин кытта” эҕэрдэ кэнсиэргэ “Күлүмчээнэ” кыргыттар ансаамбыллара “Дьүөгэбэр” (салайааччы Татьяна Гаврильева), Сайаана Павлова “Чыычаах” уонна “Түһүлгэ” Норуот айымньытын киинин уус-уран салайааччыта Татьяна Гаврильева “Сааскыга” ырыалара ылланна. Полина Гагарина толоруутугар “Колыбельная” ырыаны Туйаара Яковлева олус үчүгэйдик ыллаата. Аан дойду дьахталларын күнүгэр сыанаҕа тахсан ыллаабыт кэрэ аҥаардар чугас дьонноруттан бары сибэкки дьөрбөтүн туттулар уонна бары кыттааччылар Степан Васильев ырыатыгар “Ийэҕэ махтал” ырыаны биир киһи курдук толорон бу киэһэни түмүктээтилэр.