Нэһилиэк күнэ

Кулун тутар 14 күнүгэр Хамаҕаттаҕа нэһилиэк күнэ буолан ааста. Бу күн Хамаҕаттаҕа норуот күүлэйэ буолла, атыы-эргиэн турда.

Хамаҕаттатааҕы олох-дьаһах коммунальнай хаһаайыстыбатын филиалын эр дьоно хас биирдии кэлээччи дьону, ыалдьыты собо миинин амсатан күндүлээбиттэрэ хайҕабыллаах. Бу күн нэһилиэк биэс түөлбэтэ көрдөөх оонньууларга көхтөөх кыттыыны ылан оонньоото, нэһилиэнньэ дуоһуйа сынньанна. Ону таһынан хас биирдии түөлбэ Кыайыы памятнигын тула хаар оҥоһуктары оҥорон дьэндэппиттэрэ олус кэрэтик көстүбүтэ.

Нэһилиэк күнүгэр Хамаҕатта баһылыга Иван Максимов өссө төгүл бу сыл устата туох үлэлэр ыытыллыбыттарын уонна инникитин туох-ханнык үлэлэр былааҥҥа туралларын сырдатта. Бу күн нэһилиэктэрин туһугар үлэлиир, үлэлээбит дьон грамотанан наҕараадаланнылар.

Киэһээҥҥи өттүгэр “Түһүлгэ” Норуот айымньытын киинин үлэһиттэрэ эҕэрдэ кэнсиэри бэлэхтээтилэр. Бэлиэтээн эттэххэ, Хамаҕаттаҕа күндү ыалдьыттарынан буоллулар, биир дойдулаахпыт Саргылана Максимова “Rose Gold” ылыыр бөлөҕө. Саҥа ааттанан, биллэн-көстөн эрэр бөлөх түөрт ырыаны бэлэх уунна.

Бу кэнниттэн үгүс дьон долгуйа күүтэр сүүйүүлээх лотерея саҕаланна. Бастакы сүүйүүлээх билиэти нэһилиэк ытык кырдьаҕаһа Местникова Аграфена Григорьевна тардан ылла. Ол курдук морозильнай ларь сүүйдэ эдэр ыал ийэтэ Ньургуйаана Саҕынньахова, кыһыл көмүс ытарҕаны сүүйдэ Партизан олохтооҕо Лена Гуляева. Супер призтары, саа СКС эдэр ыал аҕата Уруйдаан Васильев уонна МР 155 сааны Анна Таркаева сүүйдүлэр. Бэлиэтээн эттэххэ, Хамаҕатта нэһилиэгин бастыҥ, киэҥ туттар спортсмена Иннокентий Окоемов иккитэ сүүйэн дьону соһутта даҕаны, үөртэ даҕаны.