Интернет ситиминэн «ЫЛЛАА, КҮҤҤҮН КИЭРГЭТЭ» өрөспүүбүлүкэтээҕи ырыа күрэҕэ

Нам улууһун Хамаҕатта нэһилиэгин “Түһүлгэ” Норуот айымньытын киинин үлэһиттэрин көҕүлээһиннэринэн «ЫЛЛАА, КҮҤҤҮН КИЭРГЭТЭ» диэн өрөспүүбүлүкэтээҕи сахалыы ырыа күрэҕин интернет ситиминэн тэрийэн ыытта.

Күрэх кулун тутар 25 күнүттэн муус устар 14 күнүгэр диэри салҕанана ыытылынна. Ол курдук ырыа күрэҕэр өрөспүүбүлүкэ араас муннуктарыттан уопсайа 12 ырыаһыт уонна эр дьон ансамбыла көхтөөх кыттыыны ылла.

Нам улууһун Фрунзе нэһилиэгиттэн Петр Бурнашев, «Эр хоһууттар» вокальнай ансаамбыл, Модуттан Владислав Ядреев уонна Намтан Саргын Кыыһа Уран Күннэй; Үөһээ Дьааҥы улууһуттан Андрей Васильев; Чурапчы улууһун Мындаҕаайытыттан Лидия Диодорова; Горнай улууһун Атамайытыттан Диана Жиркова уонна Петр Жирков уонна Бэрдьигэстээхтэн Аурика Федорова; Хаҥалас улууһун Сиинэтиттэн Аксинья Никодимова; Дьокуускай куораттан Саргылаана; Уус-Дьааҥы улууһуттан Рената Григорьева; Орто Халыма улууһуттан Николай Бандеров.

Күрэх түмүгүнэн, Горнай Атамайыттан кыттыыны ылбыт Диана Жиркова кэрэ куоластааҕынан ааттанан 2000 солкуобайынан наҕараадаланна. Салгыы, Нам улууһун олохтооҕо Владислав Ядреев 1500 солкуобайынан уонна Бэрдьигэстээх олохтооҕо Аурика Федорова 1000 солкуобайынан наҕараадаланнылар. Ону тэҥэ, Үөһээ Дьааҥыттан кыттыыны ылбыт Андрей Васильев биһирэбил аатын ылан 500 солкуобайы ылла.

Бары кыттыыны ылбыт ырыаһыттарга “Түһүлгэ” Норуот айымньытын киинэ барҕа махталын тиэрдэр! Ырыаны аргыс оҥостон бар дьоҥҥутун бу курдук үөрдэ сылдьыҥ! Хамаҕатта култууратын үлэһиттэрэ көхтөөх кыттыыны ылан бииргэ буолбуттарыгар үөрэрин биллэрэр!