"Чоргуй чобуо чабырҕах" күрэх

Самаан сайыммыт салаллыбытынан, Хамаҕатта нэһилиэгин “Түһүлгэ” норуот айымньытын киинэ муус устар 23 күнүттэн ыам ыйын 22 күнүгэ диэри “Чоргуй чобуо чабырҕах!” диэн чабырҕах аһаҕас күрэҕин тэрийэн ыытта. Күрэххэ куйаар ситиминэн, сааһыттан хааччаҕа суох биирдиилээн уонна бөлөҕүнэн чабырҕахсыттар кыттыыны ыллылар.

Ол курдук анал ааттар хаһаайыттарынан буоллулар: “Кэскиллээх чабырҕахсыттар” – Нам улууһун Партизан нэһилиэгиттэн, Саргылана Протопопова салайааччылаах “Чоргуй чобуо оҕолор” бөлөх; “Төрүт үгэһи тарҕатааччы” – Хаҥалас улууһун Булгунньахтааҕын олохтооҕо, Антонина Петрова; “Сэргэх чабырҕахсыттар” – Хатыҥ-Арыы нэһилиэгиттэн, Степан Находкин салайааччылаах “Ситим” бөлөх.

“Түһүлгэ” НАК коллектива көхтөөх кыттааччыларыгар өссө да үрдүк ситиһиилэри, Саха төрүт үгэһин тарҕата сылдьалларыгар барҕа махталын биллэрэр.