ХАМАҔАТТА ЧУЛУУЛАРЫН ҮЙЭТИТЭР “АЛБАН ААТ” СКВЕР

Нам улууһун Хамаҕаттатыгар өссө биир бэлиэ түгэн буолан ааста. Ол курдук, бу күн “Албан Аат” сквер үөрүүлээх аһыллыыта онлайн эрэсииминэн ыытылынна. Бэлиэтээн эттэххэ, Саха Өрөспүүбүлүкэтин салалтата, Хамаҕатта нэһилиэгин дьаһалтата уонна олохтоох нэһилиэнньэ нэһилиэк сайдарыгар кыттыгас үбүлээһинэ быһаччы оруоллааҕын бу тутуу көрдөрдө.

Арыллыы тэрээһинин Хамаҕаттатааҕы “Түһүлгэ” норуот айымньытын киинин үлэһитэ Татьяна Гаврильева иилээн-саҕалаан ыытта. Тэрээһиҥҥэ Надежда, Петр Макаровтар ырыа бэлэх ууннулар. Салгыы, Хамаҕатта нэһилиэгин баһылыга Иван Максимов, баһылыгы солбуйааччы Дарья Протопопова уонна урбаанньыт Михаил Бурнашев кыһыл лиэнтэни кырыйаннар, сквери арыллыбытынан аахтылар. Бу үөрүүлээх түгэҥҥэ нэһилиэк олохтоохторугар Нам улууһун баһылыгын солбуйааччы Анатолий Павлов интернет ситиминэн бэйэтин эҕэрдэ тылын, баҕа санаатын эттэ. Маны тэҥэ, Иван Николаевич уонна сквер тутуутун ыыппыт Михаил Афанасьевич биир дойдулаахтарыгар тыл бастыҥын эттилэр. Ону таһынан, үөрүүлээх күҥҥэ кыһамньылаах үлэлэрин иһин, Василий Широких, Алексей Захаров уонна Петр Макаров наҕараада суруктары туттулар. Тэрээһин түмүктэниитэ, дьаһалта үлэһиттэрэ бэйэлэрин суруктарын уонна нэһилиэк билиҥҥи хаартыскаларын “Капсула времени” иһити сир анныгар кистээтилэр. Билиҥҥини кэпсиир суруктар, хаартыскалар аны 50 сылынан биирдэ арыллыахтара.

Чулуу дьон аатын ааттатыахтаах тутуу үлэтин үрдүк эппиэтинэһэ олохтоох урбаанньыкка Михаил Бурнашевка анаммыта. Ол курдук, 2019-2020 сыллар усталара “Албан Аат” сквер тутуллан олоххо киирдэ. 2019 с. үлэһиттэр сквер сирин, тротуарнай плиткатын уонна бордюрун оҥорон саҕалаабыттар. Онтон быйыл Бочуот дуоскатын таҥан, уотун тардан түмүктээбиттэрин Иван Максимов кэпсиир. Аны туран, сквери үөһэттэн көрдөххө, тротуарнай плиткатыгар Хамаҕатта нэһилиэгин эмблемэтэ ойууламмыт.

“Дьон-сэргэ кэлэн дуоһуйа сынньанарыгар бары усулуобуйа барыта тэрилиннэ. Сайынын “Албан Аат” сквергэ фонтан үлэлиэҕэ, ыскамыайкалар баар буоллулар. Саҥа тутууга саамай сүрүнэ буолар, кэлэр көлүөнэ ыччат урукку сылларга үлэлээн ааспыт, Хамаҕаттаны Хамаҕатта дэппит туруу уонна ситиһиилээх үлэһиттэрбитин, нэһилиэги салайан кэлбит үтүөлээх дьоннорбутун билиэҕэ, убаастыаҕа, ытыктыаҕа уонна киэн туттуоҕа”, – диэн баһылык этэр.

Бочуот дуоскатыгар билигин 45 киһи аата сурулунна. Балар истэригэр үөрэҕирии, култуура, искусство үтүөлээх үлэһиттэрэ, Сэбиэскэй Сойуус саҕана аҥардас күүстээх үлэнэн ситиһэн үрдүкү наҕараадаҕа тиксибиттэр, оҥорон таһаарыы бастыҥнара бааллар. Онон нэһилиэккэ холобур буолар ааттаах-суоллаах дьон төрөөн-үөскээн барбыттарын кэпсиир өйдөбүнньүк өр сылларга туоһу буолан туруоҕа. Инникитин да маннык чулууттан чулуулар эбиллэн иһэллэригэр баҕарабыт.

Ол курдук, Бочуот дуоскатыгар киирбиттэртэн маннык киэн туттар дьоммут бааллар: Нам улууһун, Хамаҕатта нэһилиэгин гимнэрин суруйбут Василий Ушницкай-Сэки, Ленинград куорат блокадатын кыттыылааҕа Эльви Ушницкая уонна аатырбыт худуоһунньук Ефим Шапошников.

“Бүгүҥҥү тэрээһиҥҥэ “Капсула времени” кистэннэ. Маны дьаһалта үлэһиттэрэ көҕүлээһиннэринэн, кэлэр ыччат билэрин туһуттан, “Албан Аат” сквери ким оҥорбутун, үлэ хайдах быһыылаахтык барбытын туоһулуур, кэпсиир сурук буолар. Сыллар ааһыахтара, аны 50 сылынан кэнэҕэски ыччаппыт билиэхтээхтэр уонна көрүөхтээхтэр. Ханнык баҕарар үлэҕэ утумнааһын диэн баар буолуохтаах, үлэ быстан хаалбакка салҕаныахтаах. Ол онтон бу биир көрүҥэ – “Капсула времени” буолуоҕа. Бу сквер тутуллуута нэһилиэк өссө биир ситиһиитэ буоларын умнуо суохтаахпыт”, – диэн бэйэтин санаатын Иван Максимов үллэстэр. “Албан Аат” сквергэ Хамаҕатта нэһилиэгин чулууларын ааттара көмүс буукубанан суруллан үйэлэртэн үйэлэргэ хаалыаҕа!

Хамаҕаттатааҕы "Түһүлгэ" норуот айымньытын киинин звукооператора,

Харысхан ПОПОВ