"Айан аартыктаах, суоппар кэпсээннээх"

Суоппардар күннэрин көрсө Хамаҕатта "Түһүлгэ" норуот айымньытын киинэ интернет ситиминэн аһаҕас күрэх ыытта. Ол курдук суоппардар айаҥҥа араас мүччүргэннээх, көрдөөх түгэннэриттэн биир саамай өйдөөн хаалбыт айаннарын туһунан алтынньы 10 күнүттэн 28 күнүгэр диэри суруйан ыыттылар.

"Айан аартыктаах, суоппар кэпсээннээх" күрэх кыайыылааҕа Попов Виктор Михайлович. Кини суоппар эйгэтигэр уопсайа 31 сыл бэриниилээхтик суоппардаабыта. Ол курдук суоппар идэтигэр 1985 сылтан "Комсомольскай" совхозка үөрэнэн, үлэлээн саҕалыыр.

"Арай маннык түгэн буолан турардаах, автобуска үлэлии сылдьар кэммэр, киэһээҥҥи 17.00ч рейскэ дьон ылар 4 нүөмэрдээх стойкабар тохтоон дьоммун киллэрбитинэн бардым. Киһи олус элбэх, автобус туолла. Манна диэн эттэххэ, ол 4 нүөмэрдээх стойкаттан биһиги намнар эрэ айаннаабаппыт, "Дьокуускай - Майя" маршрута эмиэ киирсэр. Ол курдук автобуспар Майя киһитэ киирэн хаалбыт. Дьэ айаннаан иһэбит, арай, Пояркова уонна Дзержинскай уулуссалар быһа охсуһууларыгар биир киһи аймана түстэ, "Бээрэ, бу ханна-ханна айаннаан эрэби, мин Майаҕа айанныахтаах этим" диэн. Пассажирдар "Оттон биһиги Намнаан эрэбит" диэн күлүстүлэр. Дьэ оннук, куһаҕантан киһи да күлэр буолар эбит. Маннык түбэлтэлэр хаста да буолан тураллар. Чэ ити курдук. Суоппардыырым устата өссө да үгүс күлүүлээх түгэннэр буолан тураллар", - диэн кэпсиир Виктор Михайлович.

Убаастабыллаах суоппардар, айаҥҥыт алгыстаах, көлөҕүт эрэллээх, сырыыгыт сыыдам сымнаҕас буоллун!