“Баҕа санаам” акция-концерт

Олунньу 12 күнүгэр «Түһүлгэ» норуот айымньытын киинигэр “Баҕа санаам” диэн акция-концерт олус истиҥник буолан ааста. Бу кэнсиэр “Кыталыына” трио солистката, уус-уран самодеятельность актыыбынай кыттааччыта Олеся Скрябина-Лукачевская Москва куоракка Бурназяна клиникатыгар эмтэниини уонна быарыгар суһал операцияны ааһарыгар харчынан көмөлөһөр сыаллаах тэрилиннэ.

Бу киэһэ Олеся хаан уруу аймахтара Намтан, Уус Алдантан, Дьокуускайтан, Хамаҕаттаттан, Хатырык нэһилиэгиттэн, кинини кытта алтыһар доҕотторо, ыаллара, култуура үлэһиттэрэ, улуустааҕы инбэлииттэр уопсастыбалара, дьүөгэлэрэ бары түмүстүлэр. Акция-концерт ыытыы сценарийа Олесялыын куйаар ситиминэн кэпсэппит баҕа санаатынан, Олеся суруйбут хоһооннорунан, автобиографиятынан, олоҕор буолбут үөрүүлээх кэрэ кэмнэрин, ардыгар табыллыбатах хараастыылаах харах уулаах түгэннэриттэн, ыарыыны кытта охсуһар ыарахан кэмнэрин туһунан кэпсээнинэн таҥыллан сурулунна уонна маннык тутулунан ыытылынна.

“Баҕа санаам” акция-концерга кытыннылар: Олеся Скрябина-Лукачевская уола Таил, аймах бырааттара – Айсен Васильев, Влад Лукачевскай, Роберт Гаврильев уонна ыллыыр-туойар дьүөгэлэрэ.

Хамаҕаттаттан – “Кыталыына” бөлөх кыргыттара Екатерина Заболоцкая, Надежда Строева, “Сыралҕан” мини-театр артыыстара Октябрина Попова, Татьяна Гаврильева, “Ретро-Данс” народнай үҥкүү бөлөҕүн коллектива, “Айыы Хотун” үҥкүү бөлөҕө, “Түһүлгэ”, “Иэмэх” фольклор ансаамбыллара, ырыа куттаах Макаровтар дьиэ кэргэн, Сандаара Оротоо, Илья Заболоцкай, Юрий Кривогорницын.

Намтан – Үһүс көлүөнэ Арчы оскуолата “Ситим” айар-тутар үҥкүү бөлөҕө, улуустааҕы инбэлииттэр обществоларыттан ырыаһыт Виктория Иванова.

Хатырык нэһилиэгиттэн – “Уйгууна” үҥкүү бөлөҕө, “Махсыым уолаттара” эр дьон ырыа ансаамбыла. Маны тэҥэ, аймах – дьон көҕүлээһиннэринэн минньигэс ас арааһын атыыта тэрилиннэ.

Акцияҕа уопсайа төһө суумма киирбитин счетнай хамыыһыйа сэкэритээрэ, Олеся балта Охлопкова Күннэй Николаевна бар дьоҥҥо иһитиннэрдэ. Уопсай киирбит суумма - 211,021 солк., ол иһигэр, кэнсиэртэн – 53, 250 солк., биирдиилээн дьон, аймахтар, дьүөгэлэрэ, үлэлээбит тэрилтэлэрэ, кулууб – 150,300 солк., ас атыыта – 7471 солк. хомуллан Олесяҕа туттарылынна.

"Кырдьыбат, ыалдьыбат эмп – бу киэҥ көҕүс, күүстээх санаа” – диэн туран Олесябытыгар бары ыарыыны тумнарыгар алгыс тылларын анаатыбыт, бары, санаабытын холбоон, суон тиит курдук сомоҕолоһон, Олеся баҕа санаатынан, сорукпутун ситтибит, соргубутун тутан, тоҕуоруһа мустан бигэ түмсүүлээхпитин бигэргэттибит.