«Илгэлээх ийэ тыл эйгэтэ, төлкөлөөх төрүт тыл түһүлгэтэ»

Олунньу 13 күнүгэр, "Түһүлгэ" норуот айымньытын киинин үлэһиттэрэ, Нам улууһугар Сомоҕолоһуу сылынан, Төрөөбүт төрүт тыл уонна сурук-бичик күнүнэн «Илгэлээх ийэ тыл эйгэтэ, төлкөлөөх төрүт тыл түһүлгэтэ» диэн Хамаҕатта нэһилиэгин тэрилтэлэрин икки ардыларыгар хамаанданан ӨЙ, ТОЛКУЙ ООННЬУУТУН сэргэхтик тэрийэн ыыттылар.

Кулууб үлэһиттэрэ сахалыы алаадьынан, балык искэҕин кэтилиэтинэн, итии чэйинэн күндүлээтилэр, сахалыы норуот ырыатынан тэрээһини арыйдылар.

Биэс тэрилтэ 6-лыы киһилээх түмсэн, биэс түһүмэхтээх оонньууга, уопсайа 30 буолан көхтөөхтүк кытыннылар. Бастакы түһүмэххэ Нам улууһун бэйиэттэрин талан ылан, бэйиэт туһунан билэллэрин кэпсээтилэр, хамаандаларын аатын «бэйиэттэр” ааттарынан ааттанан оонньуу интэриэһинэй буолла. Ол курдук, олохтоох дьаһалта – “Сабарай Илгэ”, Е.М. Шапошников аатынан орто оскуола – “Рыкунов”, балыыһа – “Дунаев”, саха-француз лицей – “Сэки”, “Тускул” оҕо саада – “Саргын” диэн буоллулар.

Хамаандалар олоҥхоттон хоһуйууга дьоруойдары таайдылар, “кэл кэпсээ...” түһүмэххэ буукубаларынан көрдөөх кэпсээни кэпсээтилэр, олохтоох мелодистар айбыт уонна толорор ырыаларын таайдылар, “Тылы таай” түһүмэххэ хамандыырдар наушник кэтэн олорон оонньуу кыттыылаахтарын айахтарын хамсаныыларынан тылы таайаннар, сороҕор сыыһа этэннэр олус бэһиэлэйдик оонньоон, бу түһүмэх улахан интэриэһи тарпытын сэргии иһиттибит.

Оонньуу түмүгүнэн, I миэстэ - саха-француз лицей – “Сэки”, II миэстэ – “Тускул” оҕо саада – “Саргын”, III миэстэ - олохтоох дьаһалта – “Сабарай Илгэ” хамаандалара кыайыылаахтарынан ааттаннылар. Бары кыттыбыт тэрилтэлэрбит көхтөөх кыттааччыларыгар туоһу суруктар туттарылыннылар.

Сомоҕолоһуу сылынан, Төрөөбүт төрүт тыл уонна сурук-бичик күнүнэн эҕэрдэлэһэн сахабыт оһуорун үҥкүүтүн бары күргүөмүнэн флеш-мобтаан, тоҥолохтон тутуһан уруй оһуохайын оройуттан тутан, сэниэ ылан чэпчээн, аны да мустуох, оонньуох буолан бары үчүгэйи баҕаран тарҕастыбыт.