Нам улууһугар бастакы ыалдьыт - Сиэйэ Уола

Нам улууһугар саҥа 2022 сыл маҥнайгы күннэригэр Саха сирин биллэр дьонуттан аан бастакынан Сиэйэ Уола ыалдьыт буолуоҕа. Ол курдук, норуот билиммит ырыаһыта Баабыр сылын бастакы күнүгэр ис дууһатыттан таһаарар ырыаларын хамаҕатталарга бэлэх уунна.

Хамаҕатта нэһилиэгэр буолбут тэрээһини Альберт Михайлов үрдүк таһымҥа иилээн-саҕалаан ыытта. Ону тэҥэ, истиҥ кэнсиэргэ Айаал Кириллин-КҮНДЭЛ ырыа ыллаан кыттыста. Толору дьонноох саалаҕа үөрүү иэйиитэ, эйгэтэ баһылаан турбута – күндү ыалдьыт хас биирдии ыллаабыт ырыаларыгар олохтоохтор “Браво” улахан саҥа таһаарыылара, тэбис тэҥҥэ ырыа алыбыгар киирэннэр үҥкүүлээн ыллаһаллара, тапталлаах ырыаһыттарын күүппүттэрэ хамсаныынан көстүбүтэ. Маны туора харах көрөрүгэр олус долгутуулааҕа, киһи эрэ ис дууһатыттан тэҥҥэ үөрэрэ. Виктор Иванов хас биирдии ыллаабыт ырыаларыгар кыратык тохтоон ырыа хантан, хайдах айыллыбытын туһунан быһаарара. Маны этэн туран, дьон кутун туппут ырыаһыт ханнык баҕарар тэрээһиҥҥэ, сыанаҕа аан маҥнай тахсарыгар кыратык долгуйан ыларын этэн аһарда.

Саха сиригэр ураты улахан кэнсиэр бэлэмнии сылдьалларын, онно хаалбыт бириэмэҕэ үгүс үлэлэр ыытыллыахтаахтарын Сиэйэ Уола этэр. Бэлиэтээн эттэххэ, Виктор Иванов республика дьоно-сэргэтэ бары билэр ырыаһыта Иннокентий Васильев-Лэгэнтэйи, үгүс киинэҕэ оонньоон дьон биһирэбилин ылбыт Георгий Бессоновы кытта бииргэ үөрэммитэ.

“Саҥа сылга, саҥа ыйга Нам улууһугар кэллибит. Тохсунньу 2 күнүгэр улуус киинигэр Шестаков аатынан сынньалаҥ кииҥҥэ айанныахпыт. Салгыы, үгүс үлэ күүтэринэн сибээстээн, тохсунньу 6 күнүгэр диэри Мэҥэ Хаҥалас нэһилиэктэринэн ыалдьыттыахпыт. Бүгүҥҥү киэһэҕэ кэнсиэри ыыппыт Альберт Михайловтыын тэҥҥэ сылдьыбыппыт быданнаата, оттон Айаал Кириллин-КҮНДЭЛЛИИН бу соторутааҕыта ыллаан-туойан, кэнсиэрдээн саҕалаатыбыт.

20 сыл анараа өттүгэр, бииргэ үөрэммиттэр Хамаҕатта нэһилиэгэр кэнсиэрдээн турардаахпыт. Ити курдук, “Түһүлгэ” норуот айымньытын киинигэр киһи ахтар-саныыр эдэр сааспыт түгэннэрэ элбэх.

Культура эйгэтигэр оччотооҕу бүтэрбит оҕолор элбэхпит, киэҥмит. Ол курдук, устудьуоннар төһө даҕаны биир салааҕа туһунан бөлөхтөрүнэн үөрэннэрбит, куруук бииргэ тутуспутунан сылдьарбыт. Кинилэр бары Саха сиринэн тэнийэн күүстээхтик үлэлии-хамныы сылдьаллар: Сунтаар улууһугар Мария Кобельянова-Тускулаана улуус культуратын салайааччыта, Николай Жирков Шестаков аатынан сынньалаҥ киин директора, Оксана Кудрина НАК “Түһүлгэ”дьиэтигэр таһаарыылаахтык үлэ ыытар”, – диэн кэпсиир Виктор Константинович (Сиэйэ Уола).

https://www.instagram.com/p/CYOAWK3M-1t/?utm_medium=copy_link - инстаграм страница