Нам улууһугар Огдооччуйа айар бөлөҕүн кытта ыалдьыттыыр

Бу күннэргэ Туйаара Стручкова-Огдооччуйа салайааччылаах бөлөх айар үлэтин Нам улууһун хас да нэһилиэгэр көрдөрүөҕэ.

Бу иннинэ Огдооччуйа 25 сыллаах айымньылаах үлэтинэн Бүлүү бөлөхтөргө, Уус Алдаҥҥа ыалдьыттаабыт. Бүгүн бөлөх Кыһыл Дэриэбинэҕэ сырытта. Салгыы Арбын, Көбөкөн, Түбэ, Бөтүҥ, Модут нэһилиэктэригэр күүтүүлээх ыалдьыттарынан буолуохтара.

"Нам улууһуттан айаммытын Олоҥхо дойдутугар Сунтаарга тутуохпут. Уһун тохтобул кэнниттэн сыанаҕа тахсыы да буоллун, дьон уһуннук олорбута ыытыллар тэрээһиннэргэ тута биллэр, көстөр", - диир Туйаара Яковлевна.

Туйаара Стручкова бэйэтин өйүттэн тахсар сыанкаларын дьон-сэргэ астына, дуоһуйа көрөр. Уруккуттан да биллэрин курдук, артыыс толору дьонноох саалаҕа оонньууруттан үчүгэй иэйии эрэ ыларын Огдооччуйа чопчулуур.

"Кэлиҥҥи сылларга сыанкалары Болдьума толкуйдуур буолла. Ону тэҥэ, Болдьума, Сандал, Стас тэрээһиннэри аҥардас ырыанан эрэ киэргэтэр буолбакка, уолаттар бэйэлэрэ оруол ылан оонньуур буоллулар. Бэлиэтээн эттэххэ, биһиги Христина Неустроевалыын уус алданнарбыт, Үөһээ Бүлүүттэн сылдьар Болдьума, Кэбээйиттэн Сандал уонна Өлөөн уола Стас Федоров бэһиэ буолан бөлөх тэринэн сылдьыбыппыт ыраатта", - диир норуот тапталын ылбыт артыыс.