Россия культуратын үлэһиттэрин күнэ

Кулун тутар 25 күнэ – Россия культуратын үлэһиттэрин күнүнэн бэлиэтэнэр. Ол курдук, Россия культуратын үлэһиттэрин күнэ бэлиэтэммитэ номнуо 14 сыла буолбутун “Түһүлгэ” норуот айымньытын киинин директора Антонина Харитонова чопчулуур.

Үс сыл устата улуус культуратын үлэһиттэрэ бииргэ түмсүбэккэ олорбуттара. Александра Парникова председателлээх улуустааҕы культура үлэһиттэрин идэлээх сойууһун комитета бастыҥ үлэлээх специалистка номинация олохтоото.

“Сыл устата үчүгэй үлэни көрдөрөн фольклорга специалист Оксана Кудрина ылла. Оксана Михайловна биһиги тэрилтэбитигэр 2006 сыллаахтан үлэлиир. Ол курдук, аҥардас кулууп иһигэр алта түмсүүлээх. “Түһүлгэ” түмсүүтэ республикаҕа киэҥник биллэр буолуор диэри үүннэ-сайынна. Түмсүүлэрин кытта уопсай биир тылы булара үтүө хаачыстыба диэн сыаналыыбын. Улуус, республика таһымнаах күрэхтэргэ кыттан 3 иһиттэн түспэт.

Культура салалтата “Фортуна” банкетнай саалаҕа олус үчүгэй тэрээһин, бырааһынньык тэрийбититтэн олус үөрдүбүт. Маннык үчүгэй эйгэлээх, таһымнаах дьоро киэһэҕэ сылдьыбатаҕым быданнаабыт. Бу барыта үлэһиттэргэ үчүгэй сыһыан, болҕомто ууруутуттан тахсар дии саныыбын тус бэйэм. Үлэлииргэ, айарга-тутарга санаабыт өссө бүк көтөҕүлүннэ”, – диэн кэпсиир Антонина Алексеевна.