"Уруйдан-айхаллан, Эҥсиэли, Нам сирэ!"

Нам улууһун муниципальнай тэриллииллэрин икки ардыларыгар ыытыллар “Уруйдан-айхаллан, Эҥсиэли, Нам сирэ!” уус-уран самодеятельность фестивалын I түһүмэҕэ кулун тутар 14-17 күннэригэр ZOOM нөҥүө буолбута.

Ол курдук, «Түһүлгэ» норуот айымньытын киинин эстрада вокалыгар Дмитрий Местников, тойукка Ульяна Иванова, хомуска Мария Тимофеева, инструмеҥҥа толорууга Дуолан Захаров уонна ораторскай искусствоҕа Валентин Абрамов көмүскээбиттэрэ. Хамаҕатта ыччаттарын биирдиилээн билиһиннэрдэххэ:

Дмитрий Местников Роза Алексеевна Кокареваҕа кыра сааһыттан вокалга дьарыктаммыта. Оскуола кэнниттэн ХИФУ норуоттар тылларын култуураларын институтугар саха тылын, литературатын уонна англия тылын салаатыгар үөрэммитэ. Үөрэнэр сылларыгар филологическай наука доктора, профессор Поликарпова Евдокия Михайловна салайар «Эйгэ» театральнай түмсүүтүгэр уһуйуллубута. Маны тэҥэ, этнопедагог, педагогика билимин кандидата, ХИФУ культорологияҕа кафедратын доцена Галина Семеновна Попова-Санаайа салайар «Хомуһун» түмсүүтүгэр кыттыбыта. Икки улахан уһуйааччы оскуолатын ааспыт Дмитрий, саха уус-уран тылын баһылаабыт ыччат билигин Хамаҕаттатааҕы Е.М. Шапошников аатынан орто оскуолаҕа английскай тыл учуутала. Нэһилиэккэ биир тарбахха баттанар талааннаах ыччаппыт.

Тойукка Ульяна Иванова. «Түһүлгэ» НАК иһинэн тэриллибит «Ситим» олоҥхоһуттар бөлөхтөрүгэр дьарыктанар. Олоҥхо театрын артыыһа СӨ культуратын туйгуна Василина Баланова тойукка дьарыгар сылдьар.

Хомуска Мария Тимофеева. Мария Хамаҕатта Саха-француз оскуолатыгар үөрэнэр сылларыгар Нам улууһугар варганнай музыка сайдарыгар улахан кылаатын киллэрбит, СР үтүөлээх үлэһитэ Дмитрий Иванович Кривошапкин салайар куруһуогар дьарыктаммыта. Ити 2007 сыллаахха. Мария Сибиирдээҕи государственнай университет тимир суол инженерын идэтин ылар. Үлэтин хайысхатын уларытан 2020 с. Дьокуускайдааҕы медицинскэй колледжы бүтэрэн, билигин Намнааҕы киин балыыһаҕа хирургия отделениетыгар сиэстэрэнэн үлэлиир.

Музыкальнай инструмеҥҥа толорууга Дуолан Захаров. Дуолан 10 сааһыттан барабааҥҥа оонньуу үөрэммитэ. «Түһүлгэ» НАК иһинэн Петр Емельянов салайааччылаах «Ракета» оҕолор тыыннаах доҕуһуол бөлөхтөрүгэр дьарыктаммыт. 2019 сыллаахха оонньуур таһымын үрдэтээри Дьокуускайга «Дом музыкантов», оҕо дьоҕурун сайыннарар «Айар-Кут Hollywood» лааҕырдарга сылдьыбыт.

Ораторскай искусствоҕа Валентин Абрамов. Олоххо инники күөҥҥэ сылдьар позициялаах, уус-уран самодеятельность актыыбынай кыттыылааҕа, «Ретро-Данс» норуот үҥкүү коллективын солбуллубат үҥкүүһүтэ, Хамаҕатта нэһилиэгин «Эркин» аҕаларын түмсүүтүн тутаах чилиэнэ. Олоххо туспа көрүүлээх, тус санаалаах, биир бигэ тыллаах эрэллээх уолбут.