Хамаҕатта олохтоохторугар үтүө үгэскэ кубулуйбут тэрээһин

Хамаҕатта нэһилиэгин күнүн чэрчитинэн, кулун тутар 19 күнүгэр “Түһүлгэ” норуот айымньытын киинигэр “Ко Дню наслега” диэн ааттаах-суоллаах нэһилиэкпит дьаһалтатын дьиэтэ билиэт тэҥнээһинин оонньуутун ыытта. Бэлиэтээн эттэххэ, олохтоохторго анаан маннык бириистээх оонньуу тэрээһинэ иккис сылын ыытыллар. Дьону-сэргэни сэргэхситэр тэрээһин хас сылын ахсын үтүө үгэскэ кубулуйан ыытылларыгар баҕарыллар.

Ол курдук, Хамаҕатта нэһилиэгин дьаһалтата 400 билиэти атыыга таһаарбытыттан нэһилиэк олохтоохторо бука бары атыыласпыттар. Биллэрин курдук, бүгүҥҥү күн туругунан сибээстээн, билиэт тэҥнээһинэ быһа холбонуунан буолан ааста. Бу күн тэрээһин хамыыһыйатын бэрэссэдээтэлинэн “Түһүлгэ” норуот айымньытын киинин дириэктэрэ Антонина Харитонова иилээн-саҕалаан, үрдүк таһымнаахтык ыытта. Хамыыһыйа чилиэттэринэн буоллулар дьаһалта үлэһиттэрэ: Ольга Кудрина, Дария Сивцева уонна Валентин Абрамов. “Бүгүн тапталлаах, хайҕаллаах Хамаҕаттабыт күнүн түмүктүүр, тэрээһинин көрөөрү, экран тула түмсүбүт, биир дойдулаахтарбытыгар, бу күн устата биһигинниин бииргэ буола олороргутугар махтанабыт!”, – диэн Антонина Алексеевна саҕалаата.

Валентин Абрамов нэһилиэнньэ көрөн олордоҕуна, биэс сиринэн турбут дьааһыктарга угуллубут билиэт корешоктарын биир уопсай эргитэр барабааҥҥа (лототрон) кутта. Бүгүҥҥү бириистээх билиэттэри Хамаҕаттабыт актыыбынай позициялаах, үлэлэригэр бэриниилээх, ситиһиилээх дьоммут хостоон таһаардылар. Ол курдук, үс бастакы сүүйүүлээх билиэттэри Хамаҕаттабыт Аҕа баһылыга Иван Максимов бэйэтин илиитинэн хаба тардан таһаарда. Салгыы, Николай Захаров, Лена Парникова, Андрей Кобяков барабаантан үс сүүйүүлээх билиэттэри утуу-субуу таһаардылар. Түөртүү билиэти Мария Аманатова, Марианна Попова, Саргылана Назарова, Анна Аргунова уонна Саргылана Зоирова таһаардылар. Саамай күүтүүлээх, сүрүн бириис (“Чезет-455” нарезной саа) билиэтин хостоон таһаарда – администрация иһинэн тэриллибит МАУ “АРТ” салайааччыта, Хамаҕатта нэһилиэгин киэн туттуута, көхтөөх ыччата Валентин Абрамов.

Бириистээх тэриллэр бары хаһаайыттарын буллулар: “Дексп” электрическэй чайник – Д.В. Сивцева; манчук комплега – В.К. Охлопков; балыксыт дьааһыга – А.А. Харитонова; булчут жилета – Р.Я. Петрова; кустары ыҥырар-угуйар тэрил – М.С. Москвитин; булчут рюкзага – Е. Васильев; 4 лиитирэлээх миискэ – Ю.С. Балаганский; манчук комплега – Г.В. Новгородов; “Ровента” фен – Н.Н. Иванова; “Поларис” өтүүк – В.В. Кудрин; Сахарнай ватаны оҥорон таһаарар “Дексп” прибор – Н.А. Белолюбская; 2 лиитирэлээх термос – Т.И. Бурнашева; паардаах өтүүк – Н.И. Жиркова; муус үүттүүр тэрил (ледобур) – В.Н. Кудрин; “Дексп” гриль – Д.С. Степанов; “Дексп” мясорубка – Е.Г. Абрамова; 5 лиитирэлээх “Галакси” мультиварка – О.И. Филиппова; сок ыган таһаарар электрическэй “Скарлетт” – Н.Г. Эверстова; “Колнер” дисковай эрбии – Л.И. Эверстова; “Горенж” микроволновай оһох – П.И. Охлопков; “Вихрь” электрическэй устуруус – М.А. Жиркова; 4 лиитирэлээх термопот “Витек” (чайник-термос) – Г.Д. Иванова; -20 кыраадыска диэри тымныыга сылааһы тутар, утуйар мөһөөччүк – А. Ядрихинская; “Самсунг” пылесос – В.В. Эверстова; электрическэй лобзик – М.Г. Винокурова; саха быһаҕа “Дьулус уус” – В.В. Канаева; “Дексп” иистэнэр массыына – М.Д. Мокрощупова; дрель шуруповерт “Бош” – С.С. Новгородова; ПВХ 1,5 миэстэлээх лодка – О.С. Герасимов; 155 лиитирэлээх морозильнай ларь – М.П. Петрова; “Чезет-455” нарезной саа – Е.Н. Жиркова.

Хамаҕатта күнэ бу курдук түмүктэннэ!