Хамаҕатта түөлбэлэрин икки ардыларыгар «Сытыы, чараас тыллаах чабырҕах» чабырҕах күрэҕэ

Аламай маҥан күн сырдык чаҕыла муҥутуур кэмигэр, тунах ыһыахха,

Оҕо – аймах мустаммыт,

Ыччаттардыын ыксалаһан,

Эмэннэрдиин эҥэрдэһэн

Түөлбэ-түөлбэнэн түмсэммит

Түһүлгэҕэ сытыы тыллаах чабырҕах түһүлгэтигэр кулгаах-харах сэгэтэн, «Сытыы, чараас тыллаах чабырҕах» дьиэ кэргэнинэн чабырҕах ааҕыытыгар күөн-күрэҕэр уопсайа 11 киһи кытынна. «Арыы Тиит» түөлбэттэн Екатерина Николаевна Быканова «Күһүн дьаһала» Иван Бубякин чабырҕаҕын ааҕан биһирэбили ылла. «Үрдэл» түөлбэттэн Антонина Абрамова кыыһынаан Сонялыын «Кулууп» Иван Бубякин-Чөҥөчөк чабырҕаҕын ааҕан үһүс бочуоттаах миэстэни ыллылар. «Кытыл» түөлбэттэн Лена Кривошапкина балтыларынаан Айлаана, Аграфена Гоголевалары кытта былыргы чабырҕаҕы иһитиннэрэн иккис миэстэни ыллылар.«Хардыы» түөлбэттэн Матрена Иннокентьевна Сивцева «Ыһыаҕы көрсүү» Мария Герасимова – Сэҥээрэ чабырҕаҕынан бастаатылар. Чабырҕаҕы этии тэтимэ, тылын чуолкайа,чабырҕах ырыата, дэгэрэҥэ; туттуута - хаптыыта, артыыстааһына, хомоҕойо, үөрэ - дьүөрэ түһэриитэ; кыттааччылар сахалыы толору таҥастаах буолуулара сыаналаммыта. Бу курдук оҕолуун-улаханныын «Саха чаҕылхай чабырҕаҕын саха бары билиэхтээх», - диэн Мария Герасимова Сэҥээрэ этэринэн «Саха өйө сытыы, мындыр, булугас буоларыгар, тыла сайдарыгар, тыына уһууругар туһалааҕынан, майгыга-сигилигэ сөрү –сөп түбэһиннэрэн, быһыы-таһаа хоһуйан бэргэнник билиһиннэринэн саха тылын мүөттээх сүмэһинин сатаан таба туттарга саха чабырҕаҕа чаҕылхайынан чахчы сөхтөрөр, сөбүлэтэр!» Күрэх кыттыылаахтарыгар барҕа махталбытын биллэрэбит. Саха тылынан уус-уран айымньыта, фолклора кэлэр көлүөнэ чыччакка уостан-уоска бэриллэн тиһигин быспакка үүнэ-сайда турарыгар баҕарабыт.

Оксана Кудрина