Хамаҕатталар үбүлүөйдээх сыл үйэтитиллэр Оһуохайыгар орто дойду оһуордаах олоҕун уруйдаатылар

Ыһыах күн биир ураты тэрээһининэн М.К.Аммосов төрөөбүтэ 125, Саха Автономията төрүттэммитэ 100,Улуу Кыайыы 77 сылларынан үс иилээх түөлбэ түһүлгэтэ төрүттэнэр төлкөлөөх оһуохай ыытыллыыта буолла.

Орто дойдубут оһуор ойуунан оонньуур кэмигэр дьол, олох салҕанар уйгулаах түһүлгэни төрүттүүр ОҺУОХАЙГА Хамаҕаттабыт нэһилиэгин олохтоохторо, ытык ыһыахпыт маанылаах ыалдьыттара эдэрдиин-эмэнниин күнү батыһа хаама оһуохайы оройуттан туттулар, эһиэкэйи эҥээриттэн ыллылар.

Оһуохайы таһаардылар Хамаҕатта нэһилиэгин уус - уран самодеятельноһын актыбыыстара. Ол курдук, өбүгэлэрбититтэн кэлбит дьоҕуру кэнчээри ыччакка утумнаан үөрэтэр, СӨ норуотун уус-уран оҥоһуктарын маастара, мас ууһа, туой оҥоһуктары үйэтитээччи- күөсчүт Руслан Захаров чуһуурба айаатынан ыһыах дьонун оһуохай түһүлгэтигэр ыҥырда. “Дорҕоон тойуга» тойуксуттар, «Ситим» олоҥхоһуттар, “Күбэй» эбээлэлэр түмсүүлэрин актыыбынай кыттыылааҕа, саха тылынан уус-уран культуратын тарҕатааччы Людмила Петрова намныы оһуохайынан саҕалаата, кини кэнниттэн оҕо-аймаҕы төрөөбүт төрүт тылга үөрэтэр саха тылын уонна литэрэтиирэтин учуутала, уол оҕо хоһоон хомоҕой тылынан саҥара-иҥэрэ үөрэнэригэр сүҥкэн үлэни ыытар, аҕа уталыйбат оруолун чиэстээхтик толорор Василий Сивцев бүлүүлүү этэн тэтими эбэн көтүүтүн көҕүлээтэ, үс иилээх оһуохайы Руслан Захаров нааллаан бытаардан түмүктээтэ.

Уодай Т.Р.