Хамаҕаттаҕа “Нэһилиэк күнэ”

Кулун тутар 19 күнүгэр Нам улууһун Хамаҕаттатыгар “Нэһилиэк күнэ” үрдүк таһымнаахтык буолан ааста. Ол курдук, Хамаҕатта нэһилиэгин күнэ “Түһүлгэ” норуот айымньытын киинигэр быһа холбонуунан ыытылынна. Бэлиэ күн, нэһилиэк баһылыга Иван Максимов, улуус баһылыгын социальнай боппуруостарга солбуйааччы Петр Абрамов олохтоохторго үтүө тыл бастыҥын эттилэр, эҕэрдэлээтилэр.

Биллэн туран, бу күн нэһилиэк аатын-суолун араас хайысхаҕа, салааҕа, эйгэҕэ көмүскүүр, үлэлиир-хамныыр, уопсастыбаннай олоххо көхтөөх кыттыыны ылар, Улуу Кыайыы 75 сылыгар “Ленин” холкуос кыайыыга кылаата” кинигэ күн сирин көрөрүгэр бары күүстэрин уурбут дьоҥҥо-сэргэҕэ грамоталар, эҕэрдэ, махтал суруктар үөрүүлээх быһыыга-майгыга туттарылыннылар.

Улуус баһылыгын бочуоттаах грамотатынан Николай Захаров уонна махтал суругунан Мария Винокурова наҕараадаланнылар. Нэһилиэкпит олохтоохторо Вера Винокурова уонна Ксения Гуляева 80 саастарын туолбуттарынан улуус баһылыгыттан эҕэрдэ сурук туттулар. Улуус ветераннарын Сэбиэтин аатыттан махтал суругу тутта, нэһилиэкпит ветераннарын Сэбиэтин бэрэссэдээтэлэ Екатерина Дорофеева.

Культура эйгэтигэр, “За вклад в развитии народного художественного творчества РС(Я)” бочуоттаах бэлиэнэн Роман Софронов уонна улуус культуратын управлениятыттан бочуоттаах грамотанан Татьяна Канаева наҕараадаланнылар.

Хамаҕатта нэһилиэгин сайдыытыгар кылаат иһин, “За вклад в развитие муниципального образования “Хамагаттинский наслег” Намского улуса РС (Я)” бочуоттаах бэлиэнэн наҕараадаланнылар: Клара Федосеева, Февронья Баишева, Мария Винокурова уонна Эрилик Күндайаана Уус кыыһа. Нэһилиэк бочуоттаах грамотатынан наҕараадаланнылар: Парасковья Бурнашева, Маргарита Мухина, Елена Парникова, Наина Никитина. Нэһилиэк баһылыгын махтал суругун туттулар: Александр Дунаев, Ульяна Флегонтова, Антонина Евсеева, Афанасий Бурнашев. Бэлиэтээн эттэххэ, Улуу Кыайыы 75 сылын көрсө Александр Григорьевич “Аҕалаах ийэбин ахтар буоламмын...” уонна “Эйэ, дьол туһугар”, Ульяна Михайловна “Сырдыгы сахпыттара, аартыгы арыйбыттара”, Антонина Даниловна “Кэлэр көлүөнэ кэскилин туһугар”, Афанасий Михайлович “Хамаҕатталар архыып докумуоннарыгар” диэн суруйбут кинигэлэрин бар дьонноругар бэлэх ууммуттара. Ону тэҥэ, бу күн Хамаҕатта нэһилиэгин “Саҥа саҕахтар” хаһыат редколлегията махтал суругунан наҕараадаланна: Алена Шелковникова, Надежда Парникова, Харысхан Попов, Ольга Москвитина, Марина Корякина. Махтал сурук спорт салаатыгар: Петр Калачев, Павел Обутов, Ян Дунаев, Маргарита Охлопкова, Николай Васильев. СССР спордун маастара, Саха өрөспүүбүлүкэтин спордун туйгуна Николай Габышев аймахтарын анал стипендията гиревик уолга – Ян Дунаевка туттарылынна.

Хамаҕатта нэһилиэгэ бу сылга маннык номинациялары туттарда: “Бастыҥ спорду көҕүлээччи” анал ааты Иннокентий Окоемов; “Бастыҥ төрүт үгэстэри көҕүлээччи” анал ааты Мария Аманатова; “Бастыҥ общественнай түмсүү” анал ааты “Тупсууна” дьахтар сэбиэтэ (салайааччы Елена Парникова); “Бастыҥ сүбэһит” анал ааты Николай Захаров; “Бастыҥ спонсор” анал ааты Андрей Кобяков; “Бастыҥ урбаанньыт” анал ааты Дария Тарбахова; “Бастыҥ уус-уран самодеятельность көхтөөх кыттааччыта” анал ааты Саргылана Назарова; “Нэһилиэк бастыҥ тэрилтэтэ” анал ааты “Хамаҕатта врачебнай амбулатория” (салайааччы Наталья Жиркова); “Бастыҥ көхтөөх ыччат” анал ааты Саргылана Зоирова; “Бастыҥ кэтэх хаһаайыстыбаны тэнитээччи” анал ааты Владимир Быканов; “Нэһилиэк олоҕор көхтөөхтүк кыттар бастыҥ дьиэ кэргэн” анал ааты Елена, Николай Кривошапкиннар; “Бастыҥ бааһынай хаһаайыстыба” анал ааты Александр Жирков ыллылар.

Хамаҕатта нэһилиэгэ кэлэр сылларга бэйэтин дьонуттан өссө элбэҕи эрэнэ күүтэр, дьоно-сэргэтэ өрөйөн-чөрөйөн, киһилии сиэри сүтэрбэккэ, бары өттүнэн үүнэ-сайда турдун! Саҥа ааттар-суоллар баар буола, тахса турдуннар, төрөөбүт сиргэ-уокка таптал куруук баар буоллун!

Семен Аргунов хаартыскаҕа түһэриилэрэ