Хамаҕаттаҕа «Туоллун миэнэ сырдык ырам…» республикатааҕы мелодистар күрэхтэрэ

Нам улууһун Хамаҕатта нэһилиэгэр поэт Василий Ушницкай-Сэки кэриэһигэр «Туоллун миэнэ сырдык ырам…» диэн ааттаах-суоллаах I республикатааҕы аһаҕас ырыа айааччылар күрэхтэрэ буолан ааста. Василий Васильевич аатын үйэтитэр аһаҕас күрэххэ 13 мелодист, үс аккомпаниатор, үс солист-толорооччу уонна алта вокальнай ансамбль кыттыыны ылла. «Туоллун миэнэ сырдык ырам…» ырыа күрэҕэр, муус устар 10 күнүгэр Хамаҕаттатааҕы “Түһүлгэ” норуот айымньытын киинигэр Нам, Уус Алдан, уонна Хаҥалас улуустарын айар куттаахтара тоҕуоруһа муһуннулар. Ону тэҥэ, Өлөөн Ээйигин ырыаһыттара куйаар ситиминэн онлайн нөҥүө кыттыыны ыллылар.

Саха республикатын култууратын үтүөлээх үлэһитэ Виктор Стручков бэрэссэдээтэллээх дьүүллүүр сүбэ үлэлээтэ. Дьүүллүүр сүбэ чилиэттэрэ (СР култууратын үтүөлээх үлэһитэ Саргылана Адамова, СР култууратын туйгуна Анастасия Аммосова, Нам улууһун култууратын управлениетын салайааччыта Елена Заровняева, СР үөрэҕириитин туйгуна, Василий Ушницкай кийиитэ Люция Ушницкая) куонкурус-тэрээһин үрдүк таһымҥа ааспытын үөрэн-көтөн туран эттилэр уонна Василий Ушницкай аатынан күрэх үтүө үгэскэ кубулуйарыгар баҕа санааларын иһитиннэрдилэр.

“Добун” эр дьон ансаамбыла

Мария Нератова

Кыттааччылары наҕараадалааһын буолуон иннинэ, Нам улууһун уонна Хамаҕатта нэһилиэгин Өрөгөйүн ырыаларынан саҕаланна. Мустубут дьоҥҥо “Ретро-Данс” народнай коллектив бэйэтин эҕэрдэ үҥкүүтүн бэлэх уунна. Салҕыы, Саха-француз лицей үөрэнээччилэр В. Ушницкай тылыгар лицей Гимнин толордулар. «Туоллун миэнэ сырдык ырам…» ырыа күрэҕэр ирдэбил быһыытынан, Василий Ушницкай «Өлбөт тыыннаах полк» уонна «Кыайыы күнэ» хоһоонноругар матыыб суруйууга Нам улууһуттан Афанасий Татаринов (“Добун” эр дьон ансаамбыла) “Чыпчаал аат” Гран-При хаһаайына буолан Уһунуускайдар аймахтан 30 тыһыынча солкуобай харчынан наҕараадаланна. 1 лауреат – Нам улууһуттан Любовь Иванова (толоруу – Дмитрий Местников); Елена Евсеева (2 лауреат, Нам); Мария Нератова (3 лауреат, Хаҥалас улууһа). 1 диплом – Уус Алдантан Василий Парников (“Далбар Хотун” ансаамбыл); Владислав Ядреев “Бэйэ киһитэ” (2 диплом, Нам); Мария Григорьева (3 диплом, Нам).

Дмитрий Местников

Мария Григорьева уолунаан

Буолан ааспыт тэрээһиҥҥэ, эдэр дьонтон Елена Евсеева уонна Дмитрий Местников чуор куоластарынан баалларын биллэрдилэр. Маны тэҥэ, “Түһүлгэ” НАК саамай эдэр кыттааччыга, Мария Григорьева уола ийэтигэр фортепианаҕа оонньоон көмө буолбутугар сэмэй бэлэҕин туттарда.

“Дьүөгэлэр” ансаамбыл

Күрэх иккис салаатыгар, айар куттаахтар бэйэлэрэ, ону тэҥэ, ырыа толорооччу талбыт мелодиһын айымньытыгар ырыа ыллаан иһитиннэрдилэр. Ол курдук, “Чыпчаал аат” кыайыытын өрөгөйө уонна Уһунуускайдар туруорбут 20 000 солк. бириистэрэ СР култууратын туйгунугар Андрей Замятиҥҥа (“Нам Вальса” ырыаны Елена Кутукова салайааччылаах “Дьүөгэлэр” ансаамбыл толордо) бэйэтинэн кэллэ. 1 лауреат – Февронья Аргунова (“Таҥара кийиитэ” – Екатерина Заболоцкая, Надежда Строева, Нам); Василий Парников (2 лауреат, “Бүтэһик чуораан” – “Далбар Хотун”); Мария Григорьева (“Сайылык ахтылҕана”). 1 диплом – Александр Дунаев (“Ыллыах Ылдьаа туһунан” – “Эркин” ансаамбыл, Нам); Владислав Ядреев (2 диплом, “Олох тахсыылаах, түһүүлээх”); Зинаида Нератова (3 диплом, “Комсомол” – “Намыына”, “Эр хоһуун” холбоһуктаах ансаамбыла, Нам).

Уус Алдантан Татьяна Винокурова «Приз зрительских симпатий» уонна ыраах Өлөөн улууһуттан кыттыыны ылбыт Полина Степанова «ДЕБЮТ» номинация хаһаайыттарынан буоллулар.

РСФСР үөрэҕириитин туйгуна Василий Васильевич кэргэнэ Эльви Ушницкая тэрээһиҥҥэ мааны ыалдьыт буолла. Эльви Давыдовна чугас доҕорун туһунан кэлбит ыалдьыттар ахтан-санаан ааспыттарын долгуйа болҕойон иһиттэ. Ол курдук, Хамаҕатта нэһилиэгин баһылыга Иван Максимов, култуура управлениетын салайааччыта Елена Заровняева, “Түһүлгэ” НАК директора Антонина Харитонова эҕэрдэ тыллары эттилэр. Уус Алдантан Дойду үрдүнэн аатырбыт РФ норуот айымньытын үтүөлээх коллективын, “Кэнчээри” ансаамбылы төрүттээбит салайааччы Василий Степанович биир дойдулааҕын туһунан бэрт истиҥник, иһирэхтик ахтан-санаан ааста.

Бары кыттааччыларга анал ааттар, бириистэр олохтоноллоругар, туттаралларыгар Хамаҕатта (15 тыһ. солк.), Түүлээх (10 тыһ.) нэһилиэктэрин (Уус Алдан улууһа) дьаһалталарын дьиэлэрэ, тэрилтэлэр күүс-көмө буолбуттарын бэлиэтиир тоҕоостоох. Ону тэҥэ, Уус Алдан, Нам улуустарын култуураларын управлениеларын, Саха-француз лицей, Хамаҕаттатааҕы Ефим Шапошников аатынан орто оскуола коллективтара, Александр Дунаев анал бириистэрэ турдулар.

Нам улууһун олохтоохторугар «Туоллун миэнэ сырдык ырам…» ырыа күрэҕин кыттыылаахтара гала-кэнсиэр көрдөрөн бэлэх ууннулар. Кэнсиэри кулгаахтаах эрэ барыта сөбүлүү истэр “Кыыс кэрэ Нам сирэ” Андрей Замятин уонна Татьяна Гаврильева "Күөрэгэй" ырыаларынан түмүктээтилэр. Интеллегенция дьонуттан биирдэстэрэ, Василий Ушницкай-Сэки сырдык кэриэһиэгэр республикатааҕы аһаҕас күрэх аны икки сылынан буолуоҕа!

https://www.instagram.com/p/CNogR5Bsb0R/?igshid=pd3lynynjkct - инстаграм страница