Хамаҕаттаҕа ырыалаах, микрофоннаах массыынанан параад!

Нам улууһун Хамаҕаттатын дьоно-сэргэтэ Улуу Кыайыы 76 сылын дьиэттэн ырааппакка бары биир киһи курдук уруйдаан-айхаллаан көрүстэ. Ыам ыйын 9 күнүгэр дьаһалта дьиэтин уонна “Түһүлгэ” норуот айымньытын киинин үлэһиттэрэ баһылык Иван Максимов салайааччылаах, нэһилиэк биэс сиринэн түөлбэлээн олорор олохтоохторун эҕэрдэлээтилэр, оччотооҕу сылларга бар дьоммут Улуу Кыайыыны уһансыбыттарын кэпсээн сырдаттылар.

Кыайыы күнүгэр олохтоохтор олбуордарын таһыгар дьиэ кэргэттэрин кытта киэргэнэн-симэнэн тахсаннар, суол устун айаннаабыт ырыа-тойук аргыстаах, кэпсээн кэһиилээх массыыналары өрө күүрүүлээхтик “Ураа” хаһыынан үөрэн-көтөн көрүстүлэр. Ыраас, эйэлээх халлаан иһин турууласпыт Хамаҕатта Ытык кырдьаҕастарыгар тэрийээччилэр махтанан үтүө тыл бастыҥын эттилэр. Бэлиэ күн сылтан сыл өйгө-санааҕа умнуллубаттыы хаалар! Санатан эттэххэ, Хамаҕаттаҕа маннык массыынанан айан иккис сылын ыытыллар.

“Улуу Кыайыы үбүлүөйдээх 75 сылыгар аан маҥнай маннык тэрээһин оҥорорбутугар дьоммут соһуйбуттара, дьиктиргээбиттэрэ. Ону таһынан, былырыын күммүт-дьылбыт туруга тымныы соҕуһа, хаардаан, ардахтаан да ылбыта уонна кэмниэ кэнэҕэс күн көрбүтэ. Онтон бу 2021 сылга сылаас, сайыҥҥылыы күн турбутугар бүттүүн нэһилиэк өрө көтөҕүлүннэ, уһугунна. Дьоммутугар маннык курдук тэрээһиннэри оҥорорбутуттан олус үөрэбит”, – диэн кэпсииллэр баһылык Иван Максимов, директор Антонина Харитонова.

https://youtu.be/voTwe6JTCwc - Ютуб канал. Григорий Местников

https://youtu.be/KQbDyy2RD_c - Ютуб канал. Илья Заболоцкий

https://youtu.be/b-iK_-pYLiY - Ютуб канал. Дмитрий Местников

https://www.instagram.com/p/COptG4fs8FB/?igshid=57lnstb4zpdd - Инстаграм страница