«Эдэрдии сайаҕас дууһаҕын кырдьарга үөрэтэ сатаама»

Быйылгы үҥкүү күрэхтэһиитин Гран-при хаһаайынынан ааттанна Хатыҥ Арыыттан Анжелика Ноговицына салайааччылаах "Сыдьаайа" ансаамбыл.

Быйыл, алтынньы 7 күнүгэр үһүс көлүөнэ оскуола саастаахтарыгар аһаҕас үҥкүү көрүүтэ иккис төгүлүн ыытылынна. Ол курдук, күрэххэ “Түһүлгэ” норуот айымньытын киинигэр тоҕус үҥкүү коллектива кэлэн барда: Дьокуускай куораттан, Тулагыттан, Нам улууһун Хатырык, Хатыҥ-Арыы, Хамаҕатта, Ленскэй нэһилиэктэриттэн кытыннылар. Уопсайа 73 киһи.

Бу тэрээһин историятын кэрэһэлээтэххэ, аан маҥнай 2017 сыл муус устар 27-тигэр, улуус таһымнаах ыытыллыбыта. Төрүөтэ диэн нэһилиэкпит сайдыытыгар сүдү кылааты киллэрсэр, культурнай олоҕор куруутун кыттар, биир көлүөнэ саастаах «Күбэй» эбээлэр түмсүүлэриттэн саҕыллыбыта. Сайдам санаалаах, дьоһун саастаах дьон актыыбынай олохторун өйүүргэ, көҕүлүүргэ анаммыт тэрээһин буолар. Дьүүллүүр хамыыһыйаҕа бэрэссэдээтэлинэн СР культуратын үтүөлээх үлэһитэ, улуус ытык киһитэ, «Ретро Данс» спортивнай бальнай үҥкүү народнай коллективын салайааччыта Любовь Алексеевна Андросова, З.П. Винокуров аатынан Намнааҕы оҕо музыкальнай искусствотын оскуолатын үҥкүүгэ үрдүкү категориялаах преподавателэ, СР культуратын туйгуна Саргылана Семеновна Кудрина, СР муниципальнай тэриллиитин туйгуна, нэһилиэк бэтэрээннэрин сэбиэтин бэрэсэдээтэлэ Екатерина Герасимовна Дорофеева олордулар. Дьүүллүүр сүбэ хас биирдии коллектив үҥкүүтүн ырытан сүбэлээн, хайҕаан биэрбитэ кыттааччыларга олус сыаналаах буолуохтаах. Быйылгы «Эдэрдии сайаҕас дууһаҕын кырдьарга үөрэтэ сатаама» аһаҕас үҥкүү көрүүтүн өйөөбүт, спонсордаабыт Нам улууһун культураҕа уонна духуобунаска, улуустааҕы социальнай харалта управленияларыгар улахан махталбытын биллэрэбит.

Күрэх кыттыылаахтара, түмсүүлэрэ эҕэрдэлээх кэлбиттэрэ ураты тыыны киллэрдэ, истиҥ эйэгэни үөскэттэ. Кыттыыны ылбыт ансаамбылларга, салайааччыларга, тэрээһиммитин киэргэппит «Ретро Данс» үҥкүү народнай коллективыгар, дьүүллүүр хамыыһыйаҕа, аҕам саастаах көрөөччүлэрбитигэр «Түһүлгэ» норуот айымньытын киинин үлэһиттэрин аатыттан махтанабыт. Инникитин даҕаны бу курдук көхтөөх, сэргэх, кэрэ, чэгиэн, эдэрдии эрчимҥитин ыһыктыбакка олоххо инники күөҥҥэ сылдьын, кытаанах доруобуйаны, уһун дьоллоох олоҕу баҕарабыт!

Оксана Кудрина